Mho ngai 06/11, tàm Hìu lơh broă Cíñ phủ, Thủ tướng Cíñ phủ ồng Phạm Minh Chính neh wă ồng Karl Van Den Bossche, Đại sứ at gơnoar broă lơgar Bỉ tàm Việt Nam di dơ̆ Đại sứ dờp kơnòl broă lơh broă tàm lơgar he dê.

Tàm dơ̆ wă, Thủ tướng Cíñ phủ ồng Phạm Minh Chính đơs nền Việt Nam sùm sền dờng màng bơta gĭt gơ̆p mờ lơgar Bỉ, tơngŏ bơta kơ̆p kờñ tàm tơngai lơh broă ồng dê, Đại sứ geh pơn jat tai tă pơgồp uă ngan tàm broă bơtàu tơnguh bơta gĭt gơ̆p lơh bơyô mờ lơh broă bal đah Việt Nam mờ Bỉ. Thủ tướng sồr 2 lơgar pơn jat tai lơh broă bal, dong kờl bal mờ gơ̆p tàm ală dơ̆ cribơyai uă lơgar mờ mpồl dunia, ngan là tàm Liên hợp quôk, ASEM, Dà Tây, ASEAN-EU…mờ pơgồp bal bơyai lơh geh cồng nha pơrjum kwang bàng kấp dờng ASEAN-EU tàm nggùl nhai 12 tus tàm lơgar Bỉ. Bè broă dà lềng tiah đah mat tơngai lik, 2 gah ring bal bơta dờng màng bơh broă gàr niam bơta ring lơngai, kơ̆ kơljap, sền gàr lơngap lơngai, bơta lơngap lơngai mờ khat gơboh gùng dà lềng mờ gùng rơndeh par, bơsong ring lơngai ală broă tam pìt tam phà jat tàm adat boh lam dunia, tàm hơ̆ geh Kông ướk Liên hợp quôk bè Adat Dà lềng nam 1982.