Tàm dơ̆ wă, Thủ tướng Cíñ phủ ồng Phạm Minh Chính pà gĭt, bơta gĭt gơ̆p lơh broă bal jŏ jòng jrô ơnàng làm uă Việt Nam mờ Nhờk gam tàm tơngai bơtàu tơnguh niam bơnĕ, tơl làm mờ bơta pin dờn cíñ trị ngai sơlơ geh tơnguh tai. Nhờk pơn jat tai là lơgar lơh broă bal lơh sa kwơ màng lam lài bơh Việt Nam dê, là lơgar dong kờl ODA dờng ngan rlau jơh, lơgar bơcri priă mờ lơgar lơh broă bal gah nhơl chờ dơ̆ 3, lơgar lơh broă bal kă bro dơ̆ 4 bơh Việt Nam dê. Lơh broă bal ală tiah đah 2 lơgar dê ngai sơlơ jrô ơnàng làm uă, là bơta lam lơh geh ngan mờ geh cồng nha ală jơnau ring bal bơh Kwang đơng lam bồ 2 lơgar dê, pơgồp bơnah sơlơ tơnguh bơta gĭt gơ̆p Việt Nam mờ Nhờk bơtàu tơnguh ngan ngồn.

Nam 2023 là nam tơngkah kir sơn rai 50 nam lơh bơta gĭt gơ̆p cribơyai broă mờ lơgar ndai đah Việt Nam mờ Nhờk, Thủ tướng Cíñ phủ ồng Phạm Minh Chính pin dờn mờ bơta pơnđơl pràn lơh ngan, nùs nhơm gĭt gơ̆p lơh bơyô, lơh broă bal đah càr Tochigi mờ ală càr bơh lơgar Việt Nam dê geh gơ gơs là broă lơh niam pa mờ là broă lơh pơn rơ ngan ai bơta gĭt gơ̆p lơh broă bal jŏ jòng jrô ơnàng làm uă Việt Nam mờ Nhờk.