Thủ tướng Cíñ phủ ồng Phạm Minh Chính, Kwang ătbồ Mpồl đơng lam Dà lơgar rơcăng sơndră kòp Kovid-19 (Mpồl đơng lam) đơng lam Pơrjum dơ̆ 18 bơh Mpồl đơng lam dê geh pờ tơn tàm internet mờ 63 càr mờ ƀòn dờng tàm gùt lơgar.

Đơs tàm dơ̆ pơrjum, Thủ tướng Cíñ phủ ồng Phạm Minh Chính đơs sùm pal gĭt nền rơcăng sơndră kòp Kovid-19 niam rlau tai nàng geh bơta lơh jăt ală kơnòl broă cíñ trị, bơtàu tơnguh lơh sa- mpồl bơtiàn bơh nam 2022, nam 2023 mờ ală nam pơn jăt tai. Mpồl đơng lam bơyai lơh dơ̆ pơrjum 18 nàng sền swì broă gơlik geh mờ broă lơh rơcăng sơndră kòp Kovid-19 kung bè ală bơta kòp bơtờp pa gơbàn ndai.

Nàng rơcăng sơndră kòp Kovid-19 geh cồng nha, sền gàr pràn kơldang să jan, màng kis làng bol dê, ai tơl bơta nàng bơtàu tơnguh wơl mờ bơtàu tơnguh lơh sa- mpồl bơtiàn kờñ pal pơn jăt tai jăt sền nền nòn, sền swì, mblàng sền broă gơlik geh, rơcăng lài geh ală broă rơndăp lơh, gùng dà broă lơh sơndră wơl mờ lam lơh dipal mờ ală jơnau digơlan gơlik geh bơh kòp bơtờp dê; mơkung di tŭ yal tơngĭt, bơtơl ală jơnau bơto pơlam broă lơh ờs mờng mờ dong kờl ƀòn lơgar tàm broă rơcăng sơndră kòp Kovid-19.