Dờp jơnau jà bơh Thủ tướng lơgar Campuchia ồng Samdech Techo Hun Sen, Củ tịc mpồl ASEAN nam 2022, Thủ tướng ồng Phạm Minh CHính geh tus còp mùl màl lơgar Campuchia bơh ngai 08 tus ngai 09 nhai 11 mờ geh tus Pơrjum dờng mpồl ASEAN mờ ală pơrjum gơrềng bal bơh ngai 10 tus ngai 13 nhai 11.

Do là dơ̆ tus còp mùl màl lơgar Campuchia sơnrờp ngan bơh Thủ tướng ồng Phạm Minh Chính dê tàm gơnoar broă Thủ tướng Cíñ phủ mờ là dơ̆ tus còp sơnrờp ngan bơh kwang đơng lam tờm lơgar Việt Nam dê tus lơgar Campuchia tàm Nam lơh bơyô bal đah lơgar Việt Nam mờ lơgar Campuchia 2022. Dơ̆ tus còp geh bơyai lơh tàm bơta git gơ̆p bàr lơgar rềp bal, lơh bơyô bal ờs mờng, lơh broă bal tơl ală bơta, kơl jăp, jŏ jòng đah lơgar Việt Nam mờ lơgar Campuchia pơn jăt tai tơnguh bơtàu kơl jăp. Bàr gah pơgồp bal bơyai lơh uă broă lơh geh kwơ, tơnkah 55 nam bơta git gơ̆p lơh broă bal mờ lơgar ndai.

Tàm dơ̆ tus còp geh kờp dŭ, Thủ tướng ồng Phạm Minh Chính geh cri bơyai mờ Thủ tướng lơgar Campuchia ồng Samdech Techo Hun Sen bal mờ Thủ tướng ồng Hun Sen tus bal mờ geh jơnau đơng lam tàm pơrjum Hòi jà bơcri priă Kă bro đah lơgar Việt Nam mờ lơgar Campuchia, Cri bơyai mờ cau bơtau lơgar Campuchia ồng Norodom Sihamoni, Củ tịc Thượng viện ồng Say Chhum, Củ tịc Quốk hội ồng Heng Samrin mờ tìp bal ờ uă kwang đơng lam dờng lơgar Campuchia dê.