Tàm dơ̆ tìp, bàr nă kwang đơng lam bồ tơlik nùs nhơm chờ hờp tŭ sền gŏ broă lơh git gơ̆p, lơh broă bal jŏ jòng đah lơgar Việt Nam mờ lơgar Philippines tơnguh bơtàu niam bơnĕ bŭ lah tìp uă kal ke tài kòp Kovid-19 gơtờp; tàm hơ̆ đơs niam broă bàr gah geh sùm cồng nha bơh ală tìp bal, cri bơyai bal dờng.

Cri bơyai broă kă bro bàr đah tơnguh bơtàu pràn kơl dang, kờp jơh khà priă tăc mờ blơi phan kă bro nam 2021 geh 6 tơmàn 800 tơlăk dolar Mỹ, uă ngan bơh lài tus tŭ do; tàm 8 nhai bồ nam do, khà do geh mờr 5 tơmàn 400 tơlăk dolar Mỹ. Thủ tướng ồng Phạm Minh Chính sồr bàr gah pơgồp bal nàng rơcang niam ai dơ̆ tus còp lơgar Philippines tus do bơh Củ tịc Quốk hội ồng Vương Đình Huệ dê. Thủ tướng ồng Phạm Minh Chính sồr bàr lơgar tơnguh broă kă bro bal, tàm hơ̆ geh broă kă bro phe; sền wơl sơbì ală bơta kal ke ờ geh kwơ, ai geh tiah kă bro mờ bơcri priă ƀuơn ai mpồl lơh sa kă bro bal in, lơh pràn kă bro phan geh lơh bơh broă lơh sa suơn sre, tàm hơ̆ uă ngan là ală bơta phan geh bơta kwơ gơguh uă. Thủ tướng sồr lơgar Philippines pơn jăt tai sền gròi, ai tơl bơta niam nàng mpồl cau lơgar Việt Nam lơh broă, ơm kis tàm lơgar Philippines.