Tơnơ̆ mờ tŭ tus Càr lơgar Bắk Kiñ sơn đờm còp mùl màl lơgar Lo mờ tus pơrjum pah nam ală cau lam lài dơ̆ 14 bơh Pơrjum Lơh sa dunia (WEF) dê, Thủ tướng Cíñ phủ ồng Phạm Minh Chính tìp măt kwang bàng anih lơh broă ala măt lơgar Việt Nam bal mờ mpồl bơtiàn cau lơgar Việt Nam kis tàm lơgar Lo.

Đơs tàm dơ̆ tìp măt, Thủ tướng Cíñ phủ ồng Phạm Minh Chính đơs tờm, Đảng mờ Dà lơgar he sùm sền mpồl bơtiàn cau lơgar Việt Nam kis tàm lơgar bơdìh, tàm hơ̆ geh mpồl bơtiàn cau lơgar Việt Nam kis tàm lơgar Lo, là dùl bơnah ờ gơtùi tam cah is bơh mpồl tam klăc dờng ală jơi bơtiàn kòn cau, là dùl tàm ală bơta pràn, bơta tờm bơh bơta pràn tơnguh bơtàu dà lơgar dê. Tàm tơngai tus, Thủ tướng kơ̆p kờñ mpồl bơtiàn cau lơgar Việt Nam kis tàm lơgar Lo pơn jăt tai tơnguh nùs nhơm dong kờl bal, ai geh uă nùs nhơm pơn yờ să jơi bơtiàn kòn cau dê, nùs nhơm tam klăc bal, dong kờl bal sơrlèt mờ kal ke; lơh ngan brồ guh, tơrgùm bal niam, lơh jăt adăt boh lam mờ pơgồp bal tàm broă tơnguh bơtàu tàm lơgar geh ơm tŭ do; mùl màl là cau tơrbŏ bal kwơ màng ai bơta git gơ̆p bal ờs mờng lơh bơyô bal mờ lơh broă bal jŏ jòng tơl ală bơta đah lơgar Việt Nam mờ lơgar Lo.