Nam 2022, Ngân hàng dà lơgar neh lơh geh uă cồng nha kuơmàng, tàm hơ̆ Ngân hàng dà lơgar gròi sền tus broă kờp sền, lơh sir kơrnuat boh lam bè priă jền mờ Ngân hàng, gàr niam tŭ tơngai mờ bơta niam; đơng pơlam broă lơh priă jền rơcang lài, ngac ngar, di tŭ mờ pơgồp bal ring niam mờ broă lơh nam priă jền, ală broă lơh dờng ndai, pơgồp bơnah gròi sền roh giă priă mờ gàr sùm kơ̆ kơljap lơh sa dờng, sơlơ chồl pràn gơguh lơh sa tàm khà jơnhua. Ngân hàng pơn jat tai lam lài tàm tam gơl sồ, pơgồp bơnah kuơmàng bơtàu tơnguh tơm priă ờ ngui priă mat pơn jat tai gơguh pràn, drơng jơnau kờñ ngai sơlơ uă bơh rài lơh sa dê.

Ala mat Cíñ phủ, Thủ tướng cih dờp mờ jờng rơ bơta lơh ngan, pơn đơl uă ngan mờ cồng nha lơh geh bơh gah Ngân hàng dê tàm nam 2022. Thủ tướng đơs loh, nam 2023 là nam geh gơtha kuơmàng dờng ngan, sồr gah Ngân hàng pal pơn jat tai ngui niam ală cồng nha lơh geh, nùs nhơm rơcang lài, tam gơl pa, bơceh pa nàng bơsong ală bơta ờ niam, ờ pràn; lơh ngan, pơn đơl lam lơh niam rlau tai, geh cồng nha rlau tai ală gơnăp gơnoar, kơnòl broă geh jàu; sơlơ chồl pràn tam gơl sồ pơgồp bal mờ tơnguh bơta niam broă drơng ala, sền gàr lơngăp lơngai, ring niam.