Mho ngai 31/10, Thủ tướng Cíñ phủ ồng Phạm Minh Chính wă ồng Kasper Rorsted, Kwang atbồ dờng Tập đoàn Adidas gam geh dơ̆ còp mờ lơh broă tàm Việt Nam. Thủ tướng Ciñ phủ ồng Phạm Minh Chính jờng rơ Adidas pơn jat tai sac rơ wah Việt Nam là lơgar lơh broă jŏ jòng mờ kwơ màng khà dùl tàm ală Anih lơh gơlik phan bơh Tập đoàn dê. Cíñ phủ Việt Nam geh pơn jat tai lơh niam wơl broă bơcri priă, lơh sa kă bro, lơh niam wơl sră nggal, sùm sền gròi, lơh geh ală bơta ƀuơn ngan nàng ală cau bơcri priă đơs bal mờ Adidas đơs is lơh sùm, pờ ơnàng mờ bơtàu tơnguh tàm Việt Nam.

Thủ tướng wă Kwang atbồ dờng Tập đoàn Adidas

Thủ tướng sồr Adidas pơn jat tai pờ ơnàng lơh sa kă bro tàm Việt Nam- dùl tiah lơh sa kwơ màng, jŏ jòng, kơ̆ kơljap jat broă lơh jŏ jòng bơh Tập đoàn dê, mơkung dong kờl, lơh geh ală bơta ngai sơlơ geh uă mpồl lơh sa kă bro Việt Nam geh tus bal tàm ală broă lơh cèng wơl priă jền uă tàm ală anih lơh gơlik phan gùt plai ù bơh Adidas dê. Ồng Kasper Rorsted yal ală cồng nha lơh sa kă bro lơh geh uă ngan tàm Việt Nam, pà gĭt Adidas geh pơn jat tai tơnguh uă khà phan lơh lơh gơlik phan tàm Việt Nam kung bè tơnguh uă rlau tai phan lơh gơlik tàm Việt Nam, geh khà kwơ màng uă rlau tàm kờp jơh phan bơna lơh geh gùt plai ù bơh Tập đoàn dê.