Đơs tàm pơrjum tơn jơh, Củ tịc Quốk hội ồng Vương Đình Huệ đơs tờm, pơn jăt tai mờ ngui niam cồng nha niam bơnĕ bơh pơrjum dơ̆ 6 Mpồl đơng lam Đảng dà lơgar khoă 13, Quốk hội neh tơnguh uă nùs nhơm geh kơnòl, tơrgùm bơta pràn, bơta ngăc ngar nàng bơsong dùl khà broă dờng, kwơ màng mờ broă lơh ndrờm bal, ring bal uă.

Tàm pơrjum do, Quốk hội ring bal 06 adăt, 03 nghị quyết geh bal kơrnoăt adăt boh lam, pơgồp jơnau đơs dơ̆ 2 rơndăp broă cih adăt kham kòp, sơm kòp (tam gơl); cri bơyai dơ̆ sơnrờp rơndăp broă cih adăt boh lam ù tiah (tam gơl) mờ 06 rơndăp broă cih adăt ndai. Tơnơ̆ mờ pơrjum do, Củ tịc Quốk hội sồr, ală kwang bàng Quốk hội gờñ tìp mờ cau tĕ khà nàng yal cồng nha bơh dơ̆ pơrjum, gàr broă lơh bal nền nòn, iăt, yal wơl song dơ pă jơnau đơs mờ jơnau kơ̆p kờñ bơh cau tĕ khà, tus bal jăt sền broă bơsong ală jơnau dan, jơnau lùp, jơnau yă bơh làng bol.