Mho òr (31/10), tàm Hìu pơrjum dờng Làng bol, tơnơ̆ mờ tŭ neh wă rò mùl màl, Tổng Ƀí thư ồng Nguyễn Phú Trọng neh geh dơ̆ cri bơyai mờ Tổng Ƀí thư, Củ tịc lơgar Lo ồng Tập Cận Bình.

            Tổng Ƀí thư ồng Nguyễn Phú Trọng cri bơyai mờ Tổng Ƀí thư, Củ tịc lơgar Lo ồng Tập Cận Bình

Tơn jơh dơ̆ cri bơyai, Tổng Ƀí thư ồng Nguyễn Phú Trọng bal mờ Tổng Ƀí thư, Củ tịc lơgar Lo ồng Tập Cận Bình sền ală Ƀộ, gah, mpồl lơh broă bal mờ ală càr, ƀòn dờng đah bàr lơgar kĭ ală sră nggal lơh broă bal tàm dơ̆ tus còp

àm nùs nhơm đềt mềr, song dơ pă, bàr kwang đơng lam neh cri bơyai bè broă bơh tơl đảng, tơl lơgar mờ bơta git gơ̆p đah bàr Đảng, bàr lơgar. Tổng Ƀí thư ồng Nguyễn Phú Trọng đơs, lơgar Việt Nam mờ lơgar Lo là bàr lơgar rềp bal, bơnơm dà dờng tam đir dùl ròt bal, ndrờm là lơgar xã hội củ nghĩa geh Đảng Kộng sản đơng lam. Bàr gah ring bal pơn jăt tai tam gơl, tìp bal dờng sùm đah kwang đơng lam bàr Đảng, bàr dà lơgar nàng tơnguh broă git wă bal, di tŭ cri bơyai, bơsong ală broă gơlik geh tàm bơta git gơ̆p đah bàr lơgar, geh sùm ală broă lơh gơ̆p bơyô bal mờ bơnàng jă tơnguh bơtàu niam bơnĕ, kơ̆ kơl jăp broă lơh git gơ̆p đah lơgar Việt Nam mờ lơgar Lo.

Tàm dơ̆ cri bơyai, bàr Tổng Ƀí thư kung neh cri bơyai nền nòn bè ală gah broă lơh bal mùl màl, ring bal pal lơh pràn kơl dang, tơnguh uă cồng nha lơh broă bal tàm ală gah lơh sa, kă bro, bơcri priă, ai geh bơnàng jă kơl jăp ai broă tơnguh bơtàu bơta git gơ̆p bal đah bàr lơgar; đơs tờm lơgar Việt Nam mờ lơgar Lo là bàr lơgar kă bro bal kwơ màng ngan mờ geh uă bơta niam bal. Tổng Ƀí thư, Củ tịc lơgar Lo ồng Tập Cận Bình đơs, lơgar Lo geh lơh ngan nàng geh sùm bơnàng jă tơnguh bơtàu broă kă bro đah lơgar Lo mờ lơgar Việt Nam jăt gùng dà ngai sơlơ ndrờm bal rơlao; ai geh bơta ƀuơn nàng lơgar Việt Nam tăc ală bơta phan geh lơh bơh broă lơh sa suơn sre, phan tàm dà tus tàm drà kă bro lơgar Lo tàm tơngai tus.