Pơn jăt tai dơ̆ lòt còp ngan ngồn lơgar Lo, drim ngai 01 nhai 11, Tổng Ƀí thư ồng Nguyễn Phú Trọng neh cribơyai mờ Thủ tướng lơgar Lo ồng Lý Khắc Cường. Tổng Ƀí thư ồng Nguyễn Phú Trọng đơs là, Việt Nam mờ Lo là bàr lơgar ơm rềp bal rềp mềl, geh bơhiàn gĭt gơ̆p lơh bơyô bơh jŏ rài, geh uă bơta ndrờm bal bè rài ătbồ cíñ trị mờ gùng lòt bơtàu tơnguh.

Anih bơyai lơh dơ̆ tìp măt cribơyai

Bàr Đảng, bàr Dà lơgar mờ làng bol bàr lơgar neh lời ai bal mờ gơ̆p in bơta kờñ bal, tàm dong kờl bal kwơmàng ngan tàm ală tŭ tam lơh jòi geh bơta lơngăp lơngai is ai jơi bơtiàn in lài do mờ broă lơh bơ̆t bơtàu củ nghĩa xã hội ngai do. Việt Nam sền dờng màng ngan mờ sùm ai lài khà dùl bơtàu tơnguh bơta gĭt gơ̆p mờ lơgar Lo; nđăp ngkời ờ tŭ lơi tam gơl, kơ̆ dơn gùng dà broă lơh “dùl lơgar Lo”.

Tổng Ƀí thư ồng Nguyễn Phú Trọng cribơyai mờ Thủ tướng lơgar Lo ồng Lý Khắc Cường

Tàm dơ̆ cribơyai, bàr gah tơngŏ bơta chờ hờp tềng đăp gùng dà bơtàu tơnguh jơh nùs, niam bơnĕ bơh bơta gĭt gơ̆p bàr Đảng, bàr lơgar dê tàm tơngai lài. Bàr gah dùl nùs bal tàm tŭ tơngai bơtàu tơnguh pa bơh bàr Đảng, bàr Dà lơgar mờ broă tàm dunia tŭ do, pal sơlơ lơh broă bal tàm jơh ală gah broă, lơh sùm cribơyai, tìp măt kwang bàng kâp dờng, sơlơ pin dờn cíñ trị, bơtàu tơnguh wơl bơtàu tơnguh; lơh pràn lơh broă bal bè kă bro, bơcri priă, lơh geh bơnàng jă phan bơna, gơn kơnờm ai bơta bơtàu tơnguh bơh bơta gĭt gơ̆p bàr lơgar dê; pơgồp bal ai priă lơh geh bơh kă bro đah 2 lơgar gơguh kơ̆ kơl jăp mờ jŏ jòng.