Tàm dơ̆ cribơyai, bàr nă kwang đơng lam bồ đơs nền bơta gĭt gơ̆p tam klăc bal, gĭt gơ̆p lơh bơyô bal kwơ màng, krơh niam đah bàr Đảng, 2 lơgar bơh Củ tịc Hồ Chí Minh mờ Kwang đơng lam bồ lơgar Cuba ồng Phi-đel lơh ngan bơt bơtàu; cribơyai ală gùng dà broă lơh nàng kờñ dong tơnguh bơta gĭt gơ̆p đah 2 gah tàm tơngai tus.

Ring bal sơlơ tơnguh bơta gĭt wă bal, dong kờl bal, gàr niam broă tàm pơgơl kwang bàng kấp dờng mờ ală kấp; pơn jat tai cribơyai lý luận, bơta mờng chài; lam lơh jat geh cồng nha ală jơnau ring bal lơh broă bal tàm ală gah broă geh bơta pràn mờ jơnau kờñ bè gah lơh sa suơn sre, gah lơh sơnơm; sơlơ tơnguh pơgồp bal, dong kờl bal mờ gơ̆p tàm ală dơ̆ cribơyai dunia. Ồng Díaz-Canel tơngŏ bơta kơ̆p kờñ ală mpồl lơh sa kă bro Việt Nam sơlơ tơnguh bơcri priă tàm ală rơndap broă lơh tàm lơgar Cuba, ngan là tàm ală gah broă bè lơh gơlik phan ngui sa, phan bơna ngui sa, kă bro rah rài.