Drim ngai 19/12, tàm Hà Nội, Tổng Ƀí thư ồng Nguyễn Phú Trọng, Ƀí thư Quân ủy Dà lơgar đơng lam Pơrjum Quân ủy Dà lơgar dơ̆ 5, tơngai lơh broă bơh nam 2020-2025 nàng cribơyai, tă pơgồp jơnau đơs mờ ring bal Jơnau yal cồng nha đơng lam, sồr lơh jat kơnòl broă ling klàng, sền gàr dà lơgar mờ broă lơh bơt bơtàu Đảng ƀộ Ling klàng nam 2022; sền gĭt gùng dà broă lơh, kơnòl broă mờ broă lơh đơng lam lơh jat kơnòl broă nam 2023.

 Đơs pơndŭt pơrjum, Tổng Ƀí thư ồng Nguyễn Phú Trọng tơngkah, tàm nam 2023 Quân ủy Dà lơgar, Ƀộ Quôk phòng bơdìh mờ broă lơh jat kơnòl broă kwơ màng ngan rlau jơh là pơgồp jơnau đơs mờ Đảng, Dà lơgar bơsong di tŭ, geh cồng nha ală bơta gơlik geh, sền gàr kơ̆ kơljap lơngap lơngai is, gơnoar tờm, tơrgùm dùl mờ tơl làm ù tiah bơh Dà lơgar dê, den pal pơn jat tai gàr kơ̆ kơljap mờ sơlơ tơnguh bơta đơng lam ngan, tơn bè tơl gah bơh Đảng gơwèt mpồl Ling klàng, Đảng ƀộ Ling klàng pal lơh krơh, lam lài tàm gùt Đảng; tơl nă kwang bàng, đảng viên, ngan là kwang bàng, kwang đơng lam bồ, kwang đơng lam ală kấp pal sùm “sền sơwì is, lơh niam wơl is” nàng tàm khat dùl bơta lơi, kal ke, bòl glar tus kàr lơi den nùs nhơm “Cau ling wa Hồ dê” kung gam sùm gàr niam kơ̆ kơljap.