Tơnơ̆ rlau 3 jơ par, tàm tŭ 1 jơ 20 phuk mho ngai 30/10 (jat jơ tiah do), rơndeh par pơndiang Tổng Ƀí thư ồng Nguyễn Phú Trọng mờ Mpồl kwang bàng kâp dờng lơgar Việt Nam neh mù tàm ƀlàng rơndeh par dunia Bắc Kinh, sơn đờm dơ̆ lòt còp ngan ngồn lơgar Lo jat jơnau jà bơh Tổng Ƀí thư Ƀan Cấp hàñ Đảng Kộng sản lơgar Lo, Củ tịc lơgar Lo ồng Tập Cận Bình dê.

Ồng Nguyễn Phú Trọng tus ƀlàng rơndeh par dunia Bắc Kinh

Dơ̆ lòt còp ngan ngồn bơh Tổng Ƀí thư ồng Nguyễn Phú Trọng dê jat jơnau jà bơh Tổng Ƀí thư, Củ tịc lơgar Lo ồng Tập Cận Bình geh lơh tơnơ̆ tŭ pơrjum dờng cau ala mat gùt lơgar dơ̆ 20 Đảng Kộng sản lơgar Lo tơn jơh geh cồng nha niam bơnĕ, mpồl kwang đơng lam bồ pa neh geh yal mờ ồng Tập Cận Bình geh pồ wơl lơh Tổng Ƀí thư tơngai lơh broă dơ̆ 3.

Broă Tổng Ƀí thư ồng Nguyễn Phú Trọng gơ gơs là kwang đơng lam bồ lơgar ndai sơn rờp còp lơgar Lo ai gŏ bơta kuơmàng bơh bơta git gơp đah Lo mờ Việt Nam dê kung bè đah Đảng Kộng sản lơgar Lo mờ Đảng Kộng sản Việt Nam. Đơs nền gùng dà ờ tŭ lơi tam gơl bơh Việt Nam dê sền dờng màng git gơp mờ Lo là broă geh lam lơh lài ngan tàm broă lơh cribơyai mờ lơgar ndai, kơp kờñ bơtàu tơnguh jŏ jòng, kơ̆ kơljap, ngai sơlơ geh cồng nha.

Bồng bi dà lơgar Việt Nam tàm ƀlàng dờng Thiên An Môn bal mờ Bồng bi lơgar Lo gờm chờ dơ̆ lòt còp

Ngai do, 31/10, dơ̆ wă rò ngan ngồn Tổng Ƀí thư ồng Nguyễn Phú Trọng geh bơyai lơh yŭ rơyùm tàm Hìu lơh broă Quôk hội Lo bơh Tổng Ƀí thư Ƀan Cấp hàñ Đảng Kộng sản lơgar Lo, Củ tịc lơgar Lo ồng Tập Cận Bình đơng lam. Tơnơ̆ dơ̆ wă rò, Tổng Ƀí thư 2 lơgar geh lam lơh cribơyai kwang bàng kâp dờng mờ sền dơ̆ kĭ uă sră nggal kuơmàng.