Mang ngai 01/11, Tổng Ƀí thư ồng Nguyễn Phú Trọng mờ Mpồl Kwang bàng kâp dờng ala măt lơgar Việt Nam neh rê tus Hà Nội, tơn jơh niam bơnĕ dơ̆ lòt còp ngan ngồn lơgar Kộng hoà Làng bol lơgar Lo jăt jơnau jà bơh Tổng Ƀí thư, Củ tịc lơgar Lo ồng Tập Cận Bình dê.

Kwang đơng lam bồ Đảng, Dà lơgar lòt tus ƀlàng rơndeh par wă rò Tổng Ƀí thư

Tàm tơngai lòt còp, Tổng Ƀí thư ồng Nguyễn Phú Trọng neh tìp măt cribơyai mờ Tổng Ƀí thư, Củ tịc lơgar Lo ồng Tập Cận Bình, tìp măt tơm bơh bơr mờ Thủ tướng lơgar Lo ồng Lý Khắc Cường, tìp măt tơm bơh bơr mờ Củ tịc Quôk hội lơgar Lo ồng Lật Chiến Thư mờ Củ tịc Ủy ƀan Mặt trận dà lơgar Lo ồng Hiệp Uông Dương. Tàm dơ̆ lòt còp, bàr gah neh kĭ hơ 13 sră nggal lơh broă bal tàm ală gah broă; geh jơnau yal bơr bal Việt Nam mờ Lo geh 13 bơta.

Tổng Ƀí thư ồng Nguyễn Phú Trọng rê tus Hà Nội

Đơs nền, dơ̆ lòt còp ngan ngồn lơgar Lo bơh Tổng Ƀí thư ồng Nguyễn Phú Trọng dê neh lơh geh cồng nha niam bơnĕ, pơgồp bơnah uă ngan tàm broă đòm jăt nùs nhơm tam klăc bal, gĭt gơ̆p lơh bơyô bal ờs mờng bơh yau đah Việt Nam mờ Lo, lơh pràn mờ lơh jrô ơnàng rlau tai bơta gĭt gơ̆p tam klăc lơh broă bal jŏ jòng tơl ală bơta đah Việt Nam mờ Lo tàm tŭ tơngai pa, tơnguh bơta ring lơngai, kơ̆ kơl jăp mờ bơtàu tơnguh pas sơm bơh kơnhoàl ù tiah do mờ dunia dê.