Đơs tàm dơ̆ pơrjum, Tổng Ƀí thư ồng Nguyễn Phú Trọng jờng rơ ngan broă lơh ngan bơh jơh gùt ling klàng dê tàm nam 2022 pơgồp bơnah bal mờ jơh gùt Đảng, gùt làng bol mờ jơh ală anih lơh broă cíñ trị, bơtàu tơnguh wơl lơh sa; tam dră rơcăng sơndră sa kwề sa kwà, bơta ờ niam; sền gàr dà lơgar, lơngăp lơngai, lơh broă mờ lơgar ndai geh tơnguh tai, bơta pràn, gơnoar broă mờ bơngă bơh dà lơgar dê pơn jăt tai geh tơnguh uă.

Tơnơ̆ tŭ mblàng sền lơh loh broă dunia, tàm tiah do yal lài gam gơbàn kal ke, ờ gơtùi gĭt lài, Tổng Ƀí thư ồng Nguyễn Phú Trọng sồr, tàm tơngai tus, jơh gùt ling klàng pal rơcăng lài, sơrbac mhar, tơnguh uă bơta pràn jak kơlôi sơnơng, yal lài, lơh jăt niam gơnoar broă tă pơgồp jơnau đơs kwơmàng mờ Đảng mờ Dà lơgar bè ling klàng, sền gàr dà lơgar; geh gùng dà broă lơh bơsong di pal, geh cồng nha ală jơnau digơlan gơlik geh, ờ gŏ di lời gơtìp rơmơ̆p ndơl, nisơna. Sền gròi uă tus tă pơgồp jơnau đơs, bơsong niam, ngac ngar geh cồng nha gĭt gơ̆p mờ dunia; ală broă lơh kơryan jơnau pơhìn tam lơh bơh gờñ, bơh ngài; ală broă tiah nhàr lơgar, bồt bơlào, dà lềng. Bal mờ hơ̆, pơn jăt tai gĭt wă mờ kơlôi sơnơng jrô ơnàng rlau tai broă lơh jăt gùng dà sền gàr dà lơgar jơh gùt làng bol, tam lơh làng bol, sền gàr Dà lơgar tàm bơta pa.