Tổng Ƀí thư ồng Nguyễn Phú Trọng pin dờn dơ̆ lòt còp rơ̆p lơh geh tềl lời wơl pa, sơlơ bơtàu tơnguh bơta gĭt gơ̆p 2 lơgar dê pơn jat tai bơtàu tơnguh niam bơnĕ rlau tai mờ gơnoar broă pa, jrô ơnàng làm uă rlau mờ geh bơta niam rlau tàm tơngai tus. Tổng Ƀí thư đơs sùm, bơta gĭt gơ̆p 2 lơgar neh geh lòng bơh tŭ tơngai mờ kơ̆p kơnờm rơ̆p ngai sơlơ bơtàu tơnguh niam bơnĕ, tài bơta kwơ bơh làng bol 2 lơgar dê.

Kwang atbồ lơgar Hàn Quôk sồr 2 gah pal sền gròi bơto bơtê rơnàng kơnòm să 2 lơgar dê; lơgar Hàn Quôk rơ̆p pơn jat tai lài ngan bơto bơtê ai cau bơsram dờng lơgar Việt Nam in, lơh geh ală bơta nàng cau bơsram dờng lơgar Việt Nam in mut bơsram tàm ală hìu bơsram Kông nghệ kao bơh lơgar Hàn Quôk dê, lơh rbàng tàm tơrbŏ bal kơ̆ kơl jap ai bơta gĭt gơ̆p lơh bơyô bal đah 2 lơgar; sồr 2 gah sơlơ tìp mat lơh kwèng làng bol, lơh pràn lơh broă bal tàm gah bơto bơtê, khoa họk kông nghệ, ai bơta gĭt gơ̆p đah lơgar Hàn Quôk mờ Việt Nam gơ gơs broă lơh lam lài tàm bơta gĭt gơ̆p dunia, 2 lơgar pơnđơl pràn lơh ngan bal tài ring lơngai, lơh broă bal mờ pas gơs.