Mho ngai 13/11, Tổng Ƀí thư ồng Nguyễn Phú Trọng wă Thủ tướng Đức ồng Olaf Scholz di dơ̆ Thủ tướng Đức còp ngan ngồn lơgar Việt Nam. Tổng Ƀí thư ồng Nguyễn Phú Trọng đơs niam cồng nha niam bơnĕ bơh dơ̆ tìp mat cribơyai broă đah Thủ tướng Đức mờ Thủ tướng Cíñ phủ ồng Phạm Minh Chính, jờng rơ ală jơnau ring bal lơh broă bal mờ ală ƀộ, gah broă lơh dà lơgar 2 gah kĭ hơ; đơs nền Việt Nam sền dờng màng git gơp lơh broă bal jŏ jòng mờ Đức.

Tổng Ƀí thư cribơyai mờ Thủ tướng Đức 2, 3 gùng dà, broă lơh dờng nàng kờñ sơlơ tơnguh lơh broă bal tàm jơh ală gah, sơlơ tơnguh git gơp 2 lơgar bơtàu tơnguh geh cồng nha, ngan ngồn, ai git gơp 2 lơgar mut tàm tŭ tơngai bơtàu tơnguh pa dipal mờ bơta kơp kờñ mờ bơta pràn bơh 2 gah dê. Nting bơr gờm chờ ală cồng nha niam ngan bơh Việt Nam dê tàm bơtàu tơnguh dà lơgar, Thủ tướng Đức đơs nền, Đức sền dờng màng git gơp lơh broă bal jŏ jòng đah Đức mờ Việt Nam, kung bè sền dờng màng gơnoar broă, bơngă tàm dunia bơh Việt Nam dê, tàm hơ̆ geh gơnoar broă bơh Việt Nam dê tàm ASEAN.