Pơn jăt tai broă tus còp mùl màl lơgar Việt Nam, mang òr (01/11), Kòn klao cau bơtau lơgar Đan Mạch ồng Frederik André Henrik Christian mờ pơ-ùr mò Mary Elizabeth neh tus bal dơ̆ tơnkah 50 nam lơh bơta git gơ̆p cri bơyai broă mờ lơgar ndai đah lơgar Việt Nam mờ lơgar Đan Mạch.

                                      Phó Củ tịc lơgar mò Võ Thị Ánh Xuân geh jơnau đơs tàm dơ̆ tơnkah

Tus bal dơ̆ pơrjum geh Phó Củ tịc lơgar mò Võ Thị Ánh Xuân bal mờ ala măt ală Ƀộ, gah lơh broă dà lơgar, ală càr, ƀòn dờng bal mờ mpồl lơh sa kă bro đah bàr lơgar. Đơs tàm dơ̆ tơnkah, Phó Củ tịc lơgar mò Võ Thị Ánh Xuân đơs loh, lơgar Việt Nam mờ lơgar Đan Mạch neh mùl màl lơh bơta git gơ̆p cri bơyai broă mờ lơgar ndai bơh nam 1971, ai geh ală bơta sơnrờp ngan tàm broă bơ̆t bơtàu broă lơh bal đah bàr lơgar dê. Bơh tŭ hơ̆, Lơgar Đan Mạch là dùl tàm ală lơgar dong kờl bal đah bàr lơgar kwơ màng ngan lơgar Việt Nam dê, pơgồp bal niam tàm broă tơnguh bơtàu lơh sa mpồl bơtiàn geh cồng nha bơh lơgar Việt Nam tŭ do dê. Neh rơlao nggùl rài tơnguh bơtàu, bơta git gơ̆p đah bàr lơgar neh tam gơl bơh bơta git gơ̆p lơh broă bal tơnguh bơtàu ờs mờng tus mờ git gơ̆p tam klăc bal, lơh broă bal, geh kwơ bal mờ neh lơh bơta git gơ̆p cri bơyai broă mờ lơgar ndai tơl ală bơta tàm nam 2013. Jăt Kòn klao cau bơtau đơs, lơgar Đan Mạch gam là lơgar geh broă kă bro, bơcri priă kwơ màng lơgar Việt Nam dê mờ geh pơn jăt tai lơh broă bal geh cồng nha, pin dờn mờ lơgar Việt Nam tàm ală gah broă lơh broă bal bè tiah kis, lơh sa suơn sre, lơh sơnơm mờ bơto bơtê mờ bơsram.