Tơngu me kwơ màng bơh dơ̆ pơrjum là sền wơl broă rơcang mờ pơgồp jơnau đơs bè tơngu me, broă pơrjum ni sơna dơ̆ 2, Quốk hội khoă 15 mờ Pơgồp jơnau đơs bè rơndăp ù tiah jơh ală broă kấp dà lơgar tơngai bơh nam 2021 tus 2030, wèt tus nam 2050.

Jăt kơrnoăt geh ai tàm Adăt broă rơndăp ù tiah nam 2017, broă rơndăp ù tiah tơrgùm bal dà lơgar là broă rơndăp ù tiah kấp dà lơgar, geh nùs nhơm jŏ jòng jăt gùng dà tam cah tiah mờ tơrbŏ bal tiah bơh ù tiah dê, tàm hơ̆ geh ù gờl, ală bồt dà lềng, tiah dà lềng mờ tiah kơl wàng trồ; broă lơh ƀòn drà mờ ƀòn lơgar; broă bơ̆t bơtàu phan bơna; ngui phan geh is mờ sền gàr tiah kis; rơcang sơndră mờ rềs àr bơh trồ tiah, rơcang sơndră mờ tam gơl trờ tiah, gàr niam bơta lơngăp lơngai dà lơgar mờ tơrgùm bal dunia.

Kung tàm ngai do, Ủy ƀan Thường vụ Quốk hội pơgồp jơnau đơs bè broă rơcang cih Adăt kham kòp, sơm kòp tam gơl mờ tơrgùm, sền wơl broă lơh jăt Nghị quyết sồ 30, Pơrjum dơ̆ sơnrờp, Quốk hội khoă 15, ai geh jơnau đơs ờ uă kơrnoăt, broă dong kờl bè gah lơh sơnơm.