1. Dơ̆ tam gơl bơta yau gơgơs bơta pa tơrmù dipal mpồl lơh broă sră pơ àr gơnoar atbồ, rơndap tap sèng wơl nhàr ùr tiah mờ lơh broă gơnoar atbồ ƀòn lơgar 2 kâp.

Ngai 01/7/2025, gùt lơgar ngan ngồn lơh broă mpồl lơh broă sră pơ àr gơnoar atbồ ƀòn lơgar 2 kâp. 63 càr, ƀòn dờng tơnơ̆ tŭ tơrgùm dùl, tơmut bal gam 34 càr, ƀòn dờng mờ 3 rbô 321 sàh, sơnah ƀòn, tiah is ồn. Tổng Ƀí thư ồng Tô Lâm đơs sùm jơnau lơh nền “rơndap tap sèng wơl ù tiah dà lơgar” là broă lơh kah yau geh gơtha kuơmàng ngan, lơh tềl dùl tŭ tơngai bơtàu tơnguh pa tàm broă lơh sir mpồl lơh broă sră pơ àr gơnoar atbồ, lơh sir kơrnuat boh lam mờ rơndap broă bơh mpồl lơh broă cíñ trị ndrờm bal, tơrmù dipal, geh cồng nha, wèt tus lơh sir dùl rài lơh broă sră pơ àr gơnoar atbồ đơng lam broă pa ngan, rềp làng bol, tài làng bol drơng broă, nàng tơl bơta kuơ gơ wèt hờ làng bol.

Lài hơ̆, lơh jat Jơnau lơh nền tàm pơrjum sồ 18 bơh Mpồl Đơng lam Đảng dà lơgar khoă XII dê, tơnơ̆ tŭ rơndap tap sèng, tơrmù dipal neh gơmù 4 anih lơh broă đảng gơ wèt dà lơgar; 25 mpồl kwang bàng Đảng; 16 đảng mpồl; 5 anih lơh broă bơh Quôk hội dê; 5 ƀộ mờ 3 anih lơh broă gơ wèt Cíñ phủ; 30 mpồl bơh sơn rờp kâp tổng kụk; 1 rbô 25 mpồl lơh broă kâp kụk; 4 rbô 413 ci kụk, cơldŭ mờ 240 mpồl lơh broă. Tàm ƀòn lơgar, gơmù 466 sờh, gah broă lơh; 644 đoàn, đảng mpồl mờ mpồl kwang bàng đảng; 3 rbô 984 mpồl kâp cơldŭ; 27 đảng ƀộ kâp hơđang tơn mờ ală mpồl lơh broă Đảng.

2. Ai lơh jat 7 Jơnau lơh nền tàm pơrjum kwơ màng lam Dà lơgar mut tàm rài bơtàu tơnguh pa

7 Jơnau lơh nền tàm pơrjum kwơ màng bơh Ƀộ Cíñ trị dê ai lơh jat lồi nam 2024 mờ 2025, tàm hơ̆ 4 Jơnau lơh nền tàm pơrjum: Jơnau lơh nền tàm pơrjum sồ 57 bè tam gơl pràn bơtàu tơnguh jak chài, măi mok, tam gơl pràn bơceh lơh mờ tam gơl sồ dà lơgar; Jơnau lơh nền tàm pơrjum sồ 59 bè mut gơrờm bal ală lơgar tàm bơta pa; Jơnau lơh nền tàm pơrjum sồ 66 bè tam gơl pa broă lơh bơt bơtàu mờ lơh jat adat boh lam lơh geh jơnau sồr bơtàu tơnguh Dà lơgar tàm tơngai pa; Jơnau lơh nền tàm pơrjum sồ 68 bè bơtàu tơnguh lơh sa cau dồ nă să is geh sền là “ 4 gah jrong tờm” mờ ală broă tờm nàng bơtàu tơnguh Dà lơgar tàm tơngai tŭ do dê, 3 Jơnau lơh nền tàm pơrjum mìng dùl tơngume sồ 70, 71,72, drờm mờ 3 gah “Rơdăp broă lơh dờng dà lơgar drơng rài kis làng bol dê” geh gơrềng tus tơl nă làng bol là năng lượng, bơto bơtê mờ bơsram, sền gròi pràn kơl dang să jan làng bol. Tơl Jơnau lơh nền tàm pơrjum tơrgùm tàm tơngume kơnhăp kơ̆ nàng Việt Nam in bơtàu tơnguh mhar mờ kơnhăp kơ̆.

Tơl kấp, mpồl Đảng, anih lơh broă Dà lơgar, mpồl cau bơh Dà lơgar tus ƀòn lơgar neh sơr băc mhar lơh ngan ngồn ală Jơnau lơh nền tàm pơrjum gơ gơs broă lơh, ală jơnau neh lơh nền, broă rơndăp lơh gơ gơs broă lơh loh làng, pơgồp bal mờ kơnòl cau lam bồ dê mờ cồng nha lơh jat, gàr niam “loh broă, loh cau, loh tŭ tơngai, loh cồng nha”.

3. Quôk hội tam gơl wơl Sơnua boh lam mờ ring bal dồ ròt ală broă lơh nền tam gơl pràn.

Ngai 16/6/2025, tàm Dơ̆ pơrjum dơ̆ 9, mờ 100% cau ala mat geh mat pờ tê ring bal, Quôk hội neh ring bal jơnau lơh nền tàm pơrjum tam gơl, bơ tơl bàr, pe bơta bơh Sơnua boh lam nam 2013 dê. Jơnau lơh nền cèng bơta kah yau do lơh gơlik tơngume adat boh lam ai broă tơrmù dipal mpồl lơh broă sră pơ àr gơnoar atbồ dà lơgar, lơh jat jơnau sồr bơtàu tơnguh tàm tŭ tơngai pa, is ồn là rơndap tap sèng rơndap broă gơnoar atbồ ƀòn lơgar mờ ală jơnau sồr bè Mặt trận dà lơgar Việt Nam, ală mpồl lơh broă cíñ trị - mpồl bơtiàn, ală mpồl lơh broă làng bol bơh Đảng, Dà lơgar jàu kơnòl.

Bơh 2 dơ̆ pơrjum ờs mờng mờ 1 dơ̆ pơrjum nisơna tàm nam 2025, Quôk hội khoă XV geh ală bơta tam gơl pa cèng bơta tam gơl pràn, ring bal kờp jơh 89 adat boh lam, 91 jơnau lơh nền tàm pơrjum, geh rlau 40% kờp jơh khà adat boh lam, jơnau lơh nền tàm pơrjum tàm jơh gùt tơngai lơh broă khoă XV. Quôk hội neh tam gơl, bơ tơl uă adat boh lam cih ală broă kuơmàng bè ù tiah, bơcri priă dà lơgar, rơndap broă gơnoar atbồ ƀòn lơgar, jàu tai gơnoar ai ƀòn lơgar in tàm broă lơh nền gùng dà bơcri priă, tam pà kes priă, rơndap tap sèng mpồl lơh broă sră pơ àr gơnoar atbồ.

4. Pơrjum dờng Đảng ală kấp geh cồng nha lơh geh bơnàng jă lơh tus Pơrjum dờng dơ̆ 14 bơh Đảng dê

Rlau 60 rơbô mpồl Đảng ƀòn lơgar, tàm hơ̆ jơh 40 Đảng ƀộ gơwèt Dà lơgar neh lơh sir Pơrjum dờng Đảng ƀộ tơngai lơh broă bơh nam 2025 - 2030 mờ bơta bal pơn rơ là broă lơh rcang lài nền nòn, niam ngan, lam lơh mhar niam mờ gờñ bè ờs wơl mpồl kwang bàng tơnơ̆ pơrjum dờng dê. Do ờ mìng là dơ̆ pơrjum cíñ trị jrô ơnàng làm uă tàm gùt Đảng, gùt ling klàng, gùt làng bol lơm mờ gam là tơngume nàng bơyai lơh geh cồng nha Pơrjum dờng dơ̆ 14 bơh Đảng dê. Is ồn, jơh 34 Ƀí thư Tỉñ ủy càr, thàñ ủy ƀòn dờng mờ bàr pe broă tờm bơh ală tiah dê tơnơ̆ pơrjum dờng ndrờm ờ gŏ di là cau tàm ală tiah dê, jat di jơnau sồr bơh Dà lơgar dê, tơngŏ nùs nhơm lơh ngan tam gơl pa broă lơh kwang bàng, tơnguh bơta di pal, tơrmù uă ngan kwang bàng tàm dùl bă tiah mờ tơnguh uă bơta duh rơngòt kơrnoat boh lam tàm ală anih lơh broă cíñ trị.

Tàm kấp Dà lơgar, Pơrjum dờng Đảng ƀộ Quôk hội, Cíñ phủ, Mặt trận Dà lơgar Việt Nam, ală anih lơh broă Đảng Dà lơgar, Mpồl ling klàng mờ Kwang àng neh rcang rơndăp tăp sèng mpồl kwang bàng jat rơndăp broă lơh pa, tơrmù niam rlau tai, loh gơnoar broă, loh konòl broă, loh gơnăp gơnoar, lơh geh jơnau sồr đơng lam tàm tơngai bơtàu tơnguh pa dê.

5. Gơguh GDP jơnhua ngan rlau jơh tàm 5 nam do

Tàm tŭ tơngai rài lơh sa dunia geh uă tam gơl ờ kơnhăp kơ̆, is ồn là bơta lòng tài broă lơh dia tàm pơn drờm bơh lơgar Mỹ dê mờ gơ rềng kơn jơ̆ ngan tài bơh trồ tiah lơh aniai, Việt Nam lơh geh khà gơguh GDP nam 2025 rlau 8,02%. Do là khà gơguh jơnhua ngan rlau jơh tàm 5 nam do. Tac phan hờ lơgar ndai là gah gơguh niam ngan bơh rài lơh sa dê tŭ rơndap tap sèng phan bơna tam gơl niam tus mpồl lơh gơlik phan, crăp mòn phan. Priă lơh geh bơh tac phan hờ lơgar ndai kờp dŭ geh rlau 920 tơmàn dolar Mỹ.

Lơh sa dờng pơn jat tai geh gàr kơ̆, roh giă priă geh gròi sền, kờp dŭ tàm khà hơ đơm 4%. Rề dia dà lơgar tus nggùl nhai 12 nam 2025 geh mờr 2 tơlak 470 rbô tơmàn đong, sơrlèt rlau 25% khà kờp dŭ lài mờ gơguh pràn pơndrờm dùl tŭ bal mờ nam lài. GDP kờp bal dùl nă cau kờp dŭ geh mờr 5 rbô dolar Mỹ, gơguh 1,4 dơ̆ pơndrờm mờ nam 2020, lam Việt Nam mut tàm mpồl lơgar geh priă jền lơh geh di mơ uă. Drà priă jền bơtàu tơnguh kơnhăp kơ̆, drà cứng khoán geh tơnguh khà sap sèng tàm drà pa pơn rơ tàm nam 2025.

6. Lơh pràn gàr tơl niam rài kis mpồl bơtiàn, lơh sir broă lơh tơn jơh hìu lơh ing, hìu ồm sèt ñhăt dà mìu

Ngai 26/8/2025, broă lơh mờ srơh tàm pơrlòng “Jơh gùt lơgar tàm sơm bat tê bal tơn jơh hìu lơh ing, hìu ồm sèt ñhăt dà mìu” tơn jơh tơnơ̆ 1 nam 4 nhai lam lơh, lơh sir gờñ 5 nam 4 nhai. Mờr 50 rơbô tơmàn đong neh geh ngui nàng tơn jơh 334 rơbô 234 nơm hìu ơm ing, hìu ồm sèt ñhăt dà mìu. Ngai 30/11/2025, Thủ tướng Cíñ phủ pơn jat tai lam lơh “Broă lơh Quang Trung” sơr băc mhar lơh wơl hìu, lơh niam wơl hìu ơm gơtìp hoàc huơr tài bơh trồ tiah lơh aniai tàm ală càr tiah đah tàm gùl lơgar mờ jơnau kờñ lơh sir lơh pa 1 rơbô 628 nơm hìu lài mờ ngai 31/1/2026 mờ lơh sir lơh niam wơl 34 rơbô 352 nơm hìu ờ diơng lài mờ ngai 31/12/2025.

Bal mờ hơ̆, uă broă lơh tam gơl pràn bè gah lơh sơnơm, bơto bơtê neh geh ai lơh jat. Jơnau lơh nền tàm pơrjum sồ 71 ai jơnau kờñ bơto bơtê mầm non bơh 3 tus 5 sơnam mờ tơnguh khà ơruh pơnu bơsram jơh kấp 3 ết ngan rlau jơh 85% tàm nam 2030; bơh nam bơsram 2025 - 2026, kơnòm dềt mầm non mờ kơnòm bơsram pe kấp dà lơgar geh ờ sa priă. Sơnđờm mut lơh 100 nơm hìu bơsram pe kấp ơm sa klo ngai tàm ală sàh tiah nhàr lơgar. Jơnau lơh nền tàm pơrjum sồ 72 ai jơnau kờñ bơh nam 2026 jơh gùt làng bol geh kham sơm kòp pah dơ̆ ờ sa priă.

7. Tam gơl pràn bè phan bơna, lơh gơlik bơnàng jă kơnhăp kơ̆ ai dà lơgar in bơtàu tơnguh

Nam 2025 lơh tềl bơta tam gơl pràn kơldang ngan bè bơtàu tơnguh phan bơna, là bơnàng jă, là bơta lài ngan kuơmàng ngan ai rơndap tap sèng phan bơna ndrờm bal, pa ngan, lơh jat jơnau sồr bơtàu tơnguh dà lơgar dê tàm rài pa. Tơnơ̆ 3 dơ̆ sơn đờm lam lơh, ngui ală broă lơh, rơndap broă lơh dờng, kuơmàng dơ̆ lĕ bal tàm gùt lơgar; neh geh 564 broă lơh, rơndap broă mờ kờp jơh priă bơcri lơh rlau 5 tơlak 140 rbô tơmàn đong; mờr 140 broă lơh dờng lơh gơs, ai ngui geh cồng nha.

Lài hơ̆ pal sền gròi ngan là ai ngui, ai rơndeh lòt rê rlau 3 rbô 500 kơi sồ gùng ù gờl rơndeh lòt mhar, wă dơ̆ par sơn rờp tàm Ƀlàng rơndeh par Long Thành, ai ngui Anih tờm drà ràng tơlik dà lơgar, ală rơndap broă lơh năng lượng kuơmàng… bal mờ hơ̆ kung sơn đờm lơh rơndap broă lơh dờng ngan Gia Bình, anih ơhò ơm Hoàn Khoai, Tiah drà Cần Giờ, tiah drà tàp pràn să jan Olympic, ală rơndap broă lơh gùng rơndeh ồs tiah drà, rơcang lơh gùng rơndeh ồs lòt mhar tiah đah tô – tiah đah jum dà lơgar, ală rơndap broă lơh drơng APEC nam 2027 tàm Phú Quốc.

8. Bơyai lơh geh cồng nha Dơ̆ tơngkah kir sơnrai dờng 80 nam Kăc màng Nhai 8 geh cồng nha mờ Ngai Sơntờm Dà lơgar 2/9; 50 nam Ngai tơngklàs tiah đah Jum Dà lơgar, tơrgùm dùl Dà lơgar.

Dùl ròt broă lơh tơngkah kir sơnrai tàm nam 2025 neh geh bơyai lơh geh cồng nha, yŭ rơyùm, di mờ gơnoar broă broă lơh dê mờ lơngăp lơngai ngan. Tàm hơ̆, ală broă lơh bơh 2 dơ̆ tơngkah kir sơnrai dờng 80 nam Kăc màng nhai 8 lơh geh cồng nha mờ Ngai sơn tờm Dà lơgar 2/9; 50 nam Ngai tơngklàs tiah đah Jum dà lơgar, tơrgùm dùl Dà lơgar neh lời wơl tềl lời wơl ờ hềt tŭ lơi geh.

Dơ̆ ai ling tàm pơdar tàm gùng tàm Ƀlàng dờng Ba Đình ndrim ngai 2/9 tàm càr lơgar Hà Nội mờ tàm gùng Lê Duẩn drim ngai 30/4 tàm ƀòn dờng Hồ Chí Minh mờ gĭt nđờ tơlak nă làng bol mờ ală mpồl ling phàu crong tus bal. Rùp hin ală mpồl ai ling lòt tàm pơdar “lòt tàm nùs nhơm làng bol” ờ mìng lơh gơrề uă jơnau yal jrô ơnàng ngan bè bơta kơ̆p kờñ lơngăp lơngai is, khat gơboh, ring lơngai, lơh bơyô bal tus mờ bơyô ală lơgar lơm mờ gam lời wơl bơta ngoh rơngăc dờng màng bè nùs nhơm sền dờng màng, pơn yờ să jơi bơtiàn.

9. Trồ tiah lơh aniai gơlik geh kal ke mờ nisơna ờ hềt gŏ bơh lài tus tŭ do, lơh gơbàn hoàc huơr kơn jơ̆ ngan bè kòn bơnus mờ phan bơna

Nam 2025 geh đơs là dùl tàm ală nam mờ trồ tiah lơh aniai gơlik geh tàm rơndap rơndồl, kal ke mờ nisơna ngan rlau jơh bơh lài tus tŭ do tàm bơta trồ tiah dà ia Việt Nam dê mờ uă bơta aniai ngòt rơngơt gơlik geh tàm uă tiah, tàm pơn jat sùm mờ gơ tàm rơndap rơndồl bè càl rbut dờng, mìu sơr tàm uă tiah, dà kŏ dà cò, dà tih dà lìu mờ tơrlah ù. Trồ tiah lơh aniai tàm gùt lơgar neh lơh 468 nă cau chơt, roh thit, 741 nă cau gơtìp sồt să; mờr 4 rbô 200 nơm hìu gơtìp tơrlah tơrlơm, 348 rbô 834 nơm hìu gơtìp ờ diơng; 545 rbô 395 lồ kòi, phan tam lơyah ngai gơtìp dà bam, hoàc huơr; 71 rbô 687 nơm phan ròng 4 jơng; 5 tơlak 160 rbô nơm iar ada gơtìp chơt, dà cò pơr dô; 171 rbô 763 hìu gŭ ròng phan tàm dà gơtìp hoàc huơr; 1 rbô 70 kơi sồ bơ tơt kìng dà, rbòng dà gơtìp hoàc huơr; 140 kơi sồ gah dà dờng, gah dà lềng gơtìp tơrlah; 1 rbô 259 kơi sồ gùng lòt gơtìp hoàc huơr. Kờp dŭ hoàc huơr rlau 98 rbô 677 tơmàn đong.

Broă lơh drơng mờ trồ tiah lơh aniai neh geh lam lơh jat gùng dà tơrgùm bal, kràñ cê, jơh nùs mờ ring bal bơh dà lơgar tus kâp hơ đơm. Bè hơ̆ den tàng, pơndrờm mờ uă lơgar gơtìp trồ tiah lơh aniai tàm kơnhoàl ù tiah rềp bal mờ dunia, hoàc huơr neh geh tơrmù uă ngan.

10. Lơh sa mờ măi mok niam chài cih tềl lời wơl mờ dồ ròt broă lơh đơs crih tam ya, ală lơma lơh geh uă ngan rlau jơh bè priă lơh geh mờ khà cau tus sền uă ờ hềt tŭ lơi geh.

Nam 2025 lơh tềl geh cồng nha bơdìh bơh broă lơh sa mờ măi mok niam chài Việt Nam tŭ drà lơh rài ƀồ tơngoh lơh geh ală bơta uă ngan rlau jơh ờ hềt tŭ lơi geh bè priă lơh geh mờ mpồl cau tus sền. Ală broă lơh geh bơyai lơh jat jơnau kờñ ală lơgar, pơgồp bal bơnĕ bơnài đah bơta kwơ ờs mờng bơh yau mờ jơnau đơs lơh rài bồ tơngoh pa ngan, cèng bềng bơta ngoh rơngăc, pơgồp bơnah lơh gơrề uă nùs nhơm kờñ gơboh Dà lơgar jat broă lơh tus bal pa. Tàm gah lơma, cih dờp uă ngan priă lơh geh uă ngan rlau jơh tàm rài kah yau dê bè cơldŭ tăc vĕ Việt mờ lơma “Mưa đỏ” lơh geh rlau 714 tơmàn đong mờ uă lơma priă lơh geh gĭt nđờ rơhiang tơmàn ndai.

Ngai 14/11/2025, Thủ tướng Cíñ phủ ồng Phạm Minh Chính neh kĭ Jơnau lơh nền ring bal broă lơh bơtàu tơnguh ală gah lơh sa mờ măi mok niam chài Việt Nam tus nam 2030, sền sơnơng tus nam 2045. Tàm hơ̆ jơnau kờñ tus nam 2030, ală gah lơh sa mờ măi mok niam chài lơh geh khà gơguh lơh sa kờp bal pơgăp 10% dùl nam mờ tă pơgồp 7% GDP bơh Dà lơgar dê. Tus nam 2045, Việt Nam gơ gơs Dà lơgar bơtàu tơnguh bè lơh sa mờ măi mok niam chài, lơh sa mờ măi mok lơh rài bồ tơngoh tàm tiah câu Á dê.