Bơh àng drim gờñ, nùs nhơm ngai tĕ khà neh hô hơng tàm ală bồt; bồng bi dà lơgar, ƀăng rôn, sră cih jơnau yal geh bơka niam ngan tàm ală anih đùh sră pồ. 

Cau tĕ khà là kwang bàng, cau ling mờ làng bol tàm bồt tàm phan soh bè ờs halà phan ling, cèng sră cau tĕ khà tus lơh jat gơnoar mờ kơnòl làng bol. Tàm nùs nhơm ki ngàm tàm nggùl dà lềng, cau tĕ khà sền sơ wì nền mat cau tơlik mat tĕ khà lài mờ tŭ ơn sră pồ tàm thùng. Tus 11 jơ 30 phuk dùl ngai bal, broă lơh tĕ khà tàm 20 tiah đùh sră neh lơh sir di broă rơndap lơh, di jơnau sồr; ală jơnum tĕ khà lam lơh kờp sră pồ, lir wơl mờ jun pơndiang sră pồ rê hờ ù gờl nàng jàu ai Anih duh broă tĕ khà tiah is ồn Trường Sa in.