Dăk Lăk tŭ do geh pơgăp 42 rơbô lồ sầu riêng, mờ rlau 26 rơbô lồ ai tơnhào, khà lơh geh rlau 440 rơbô tấn, mơya bă ù tam geh pà màh pa mìng geh 7 rơbô 400 lồ. Uă phan bơna tài bơh hơ̆ ờ hềt tus bal tăc phan mờ lơgar ndai jat sră blơi uă, lơh tơrmù bơta kwơ gah phan dê. Ala mat dùl mpồl lơh sa kă bro tam mờ tăc bro sầu riêng tàm tiah do dê đơs là, kal ke ờ gŏ di là tus bơh drà kă bro tăc phan mờ lơgar ndai lơm ờ mờ gơ ơm tàm broă lam lơh tàm lơgar dê:

“Tàm Tây Nguyên, bă ù tam tàm bơrlŭ dờng ngan mờ ờ geh pà màh suơn tam, ờ gŏ di bơh lơgar Lo ờ gŏ pà lơm ờ, mờ tài bơh he wă dồ bă ờ hềt nền nòn, gơ lik gơs gơtìp ơm wơl. Jơnau lơh nền bơh Cíñ phủ dê là 2481, 2480 cih loh làng ngan là tài bơh đah he dê lơh is, yal is mờ Tổng kụk atbồ sền sơwì phan bơna gan tiah nhàr lơgar sền sơ wì jat jơnau he dê yal. Tŭ do dilah bè đah hơđang ờ di pal, kal ke den tàm Sờh broă lơh sa suơn sre mờ Tiah ơm kis pal tam gơl pa wơl ai gơ in di pal”.

Màh sồ tiah tam là bơta sơn rờp nàng jòi gĭt tiah tờm tam phan, mơya nàng lơh geh jơnau sồr tăc phan mờ lơgar ndai kơnhăp kơ̆, broă atbồ pal geh lơh jat sùm jơh ală anih lơh gơlik phan. Ală drà kă bro blơi phan mờ lơgar ndai tŭ do ờ mìng sồr jơnau yal phan bơna tus bơh tiah lơi lơm mờ kờñ loh bè broă lơh tam phan, ngui phan bơna broă lơh sa suơn sre, tơnhào phan, ơn tàm kơldung mờ jun pơndiang. Tềng đăp jơnau sồr do, Ƀộ Broă lơh sa suơn sre mờ Tiah ơm kis gam bơt bơtàu ală măi mok jòi gĭt tiah tờm tam phan lơh geh bơh broă lơh sa suơn sre ring bal tàm gùt lơgar. Ală măi mok do ai gơnoar cih dờp jơh jơnau yal bơh tiah tam, broă tam phan, tus lơh gơlik mờ tam pà phan. Tŭ tơl bơnah phan geh bal mờ “sră nggal sồ” broă lòt sền, jòi gĭt tiah tờm lơh gơlik mờ sền gĭt kơnòl broă rơ̆p mhar ngan, song dơ pă rlau pơndrờm mờ broă atbồ mờ tê lài do.

Ồng Lê Anh Trung, Củ tịc Mpồl Sầu riêng Dăk Lăk pà gĭt, broă tam gơl tus jòi gĭt tiah tờm lơh gơlik điện tử rơ̆p dong sŏk sền sùm ală broă lơh sa. Tŭ do mpồl gam pơgồp bal mờ ală mpồl lơh sa kă bro lam lơh tơrlòng lài, lơh tus lơh sir ală broă lơh do:

“Bol añ kung neh rơwah geh ală mpồl lơh sa kă bro crăp rcang tus bal ngui lơh tơrlòng lài. Bơh sơn rờp, ai dùl mpồl lơh sa kă bro lơh tơrlòng lài sùm nàng mờ tam gơl pa ală bơta măi mok, tơnơ̆ hơ̆ hơ̆ sồng lơh ơnàng uă tiah. Să tờm ală mpồl lơh sa kă bro hơ̆ lài do khi neh bơyai lơh ală anih lơh bal rao, den tàng tŭ lam lơh den ờ di là broă lơh kal ke ir sơl. Mơya broă là bol he pal hời rơ hời tam gơl pa, gơ dờp di pal mờ gah sầu riêng. Gơ krơi ngan bơh gah bơta chài tam phan tus bal tăc bro, tus gah broă lơh gơlik phan mờ tăc phan mờ lơgar ndai”.

Jat mò Đặng Thị Thủy, Phó Kwang Lam bồ Sờh Broă lơh sa suơn sre mờ Tiah ơm kis càr Dăk Lăk nàng ală anih lơh broă do in mut lơh broă geh cồng nha, bơta lòng dờng ngan rlau jơh ờ gơ ơm tàm măi mok mờ gơ ơm tàm bơta tam gơl mờng kwèng tam phan dê. Cau lơh broă sa pal lơh kwèng mờ jơnau cih điện tử, lơh jat broă lơh; mpồl lơh sa kă bro pal bơcri priă lơh mờ song dơ pă ală jơnau; ai gơnoar atbồ ală tiah geh gơnoar broă bơto pơlam mờ jat sền. Mơya, mò Thủy đơs nền càr gam jơh nùs pơgồp bal mờ ală anih lơh broă geh gơnoar tàm broă lơh sir ală jơnau tàm măi mok nàng gơtùi ngui ring bal mờ tàm uă tiah:

“Măi mok do den lơh tơl jơnau sồr geh broă lơh tam phan kung bè là tiah tam phan tŭ do he kwi kwơ sùm, den lơh rao geh ală bơta ờ song dơ pă gơrềng tus gah broă dê. Mờ măi mok do kung dong tơnguh geh bơta niam bơkah mờ bơngă pin dờn phan bơna dê, lơh geh jơnau sồr jòi gĭt tiah tờm tam phan bơh drà kă bro tăc phan mờ lơgar ndai tŭ do dê, mờ hời rơ hời bơt bơtàu bal geh măt kă bro sầu riêng Dăk Lăk đơs bal mờ Việt Nam gam bơtàu tơnguh jat gùng dà kơnhăp kơ̆”.

Ồng Nguyễn Văn Long, Kwang lam bồ Vụ Jak chài- Măi mok, Ƀộ Broă lơh sa suơn sre mờ Tiah ơm kis pà gĭt, ală măi mok jòi gĭt tiah tờm lơh gơlik dà lơgar gam geh lơh tơrlòng lài mờ gah sầu riêng lài mờ tŭ ngui uă tiah bơh ngai 1/7/2026. Do geh sền là bơh broă tam gơl bơh atbồ tam phan ờs mờng tus atbồ mờ ală jơnau yal, tơngume kwơ màng nàng tơnguh bơta pràn jak tàm pơrlòng bơh phan lơh geh bơh broă lơh sa suơn sre Việt Nam dê:

“Bol añ kơ̆p kờñ ală măi mok jòi gĭt tiah tờm tam phan ờ mìng drơng broă lơh atbồ lơm mờ ngan ngồn gơ gơs phan ngui geh kwơ, cèng wơl bơta kwơ geh ngan ai mpồl lơh sa kă bro mờ làng bol in, pơgồp bơnah tơnguh bơngă pin dờn, gơnoar sầu riêng Việt Nam dê tàm drà kă bro ală lơgar dê”.

Bơh ală bơta kòl yan tàm pà màh sồ tiah tam tus jơnau kờñ gròi sền bơta bơkah niam ngai sơlơ kràñ, gah sầu riêng Dăk Lăk gam ơm tềng đăp bơta tam gơl dờng. Tŭ ală măi mok jòi gĭt tiah tờm tam phan geh lam lơh dơ̆ lĕ bal, tơl phan bơna rơ̆p geh “ngai sền “ loh làng, song dơ pă bơh tiah tờm tam phan dê. Do ngan là ală bơta nàng đơs nền bơta bơkah niam, tơnguh bơngă pin dờn mờ bơt bơtàu mat kă bro sầu riêng Dăk Lăk đơs is mờ sầu riêng Việt Nam đơs bal tàm drà kă bro dê.