Tơnơ̆ dơ̆ wă rò, Thủ tướng ồng Lê Minh Hưng mờ Thủ tướng lơgar Kộng hòa Slovakia ồng Robert Fico lam bồ mpồl kwang bàng kâp dờng 2 lơgar lam lơh pơrjum bơyai. Thủ tướng ồng Lê Minh Hưng đơs nền, Việt Nam rơp pơn jat tai sền dờng màng mờ kơp kờñ chồl tơnguh nàng ai bơta git gơp mờ Slovakia – dùl tàm ală lơgar lơh broă bal lài ngan bơh Việt Nam dê tàm tiah tàm gùl đah mat tơngai lik câu Âu – ngai sơlơ bơtàu tơnguh tàm jơh ală bơta, ngan ngồn mờ geh cồng nha. Bơh nùs nhơm hơ̆, 2 gah neh cribơyai ngan ngồn, sơrmah sơrmài bè ală bơta tàm dunia, ală bơta tàm lơgar rềp bal mờ ală broă lơh nàng lơh gơlik bơta tam gơl pa ngan ngồn rlau tai tàm bơta git gơp 2 lơgar; lam lơh ngan ngồn mờ lơh niam rlau tai bơta git gơp lơh broă bal jŏ jòng; pơgồp bal jơh nùs nàng bơsong ală bơta lòng tàm tiah do mờ gùt plai ù mờ wèt tus jơnau kờñ bơtàu tơnguh kơ̆ kơljap tài bơta kuơ bơh tơl lơgar dê, tài ring lơngai, kơ̆ kơljap, lơh broă bal mờ bơtàu tơnguh tàm tiah do mờ tàm dunia.