Mờ tơngume “Chồl pràn lơh broă bal lơh sa, pờ ơnàng tŭ niam bơcri priă 2 gah”, anih cribơyai geh bơta tus bal bơh 400 mpồl lơh sa kă bro 2 lơgar dê tơrgùm tàm ală gah broă, bè: măy mŏk phan sa mờ phan hùc, ICT, măy mŏk tơlir, năng lượng lơh geh wơl, điện thoại internet, bơ̆t bơtàu, lơh mòn rơndeh, priă jền, lơh sa mờ măy mŏk sền gàr dà lơgar, lơh sơnơm, phan sơnơm tơm ba, lơngăp lơngai internet, sền gàr rềs àr tăc phan mờ lơgar ndai, drơng broă sa priă kơrnoăt boh lam…Đơs tàm Anih cribơyai, Thủ tướng lơgar Kộng hoà Slovakia đơs nền bơta gĭt gơ̆p đah bàr lơgar geh bơ̆t bơtàu jăt tàm bơnàng jă lơh broă bal jŏ rài mờ jơnau kờñ tờm ngan bơh dơ̆ lòt còp dơ̆ do dê là lơh geh ală jơnau ring bal loh làng tơngguh broă gĭt gơ̆p gơguh tus Tam klăc lơh broă bal jŏ jòng.

Thủ tướng ồng Robert Fico đơs sùm, Việt Nam là bơyô kă bro phan dờng ngan rlau jơh bơh lơgar Slovakia dê tàm tiah đah Jum măt tơngai Lik câu Á. Slovakia kơ̆p kờñ tơngguh tai tăc phan mờ lơgar ndai mờ lam lơh ală rơndăp broă lơh loh làng tàm Việt Nam, ngan là tàm ală broă tờm kwơmàng, geh: Sền gàr dà lơgar, lơh rơndeh rơndồ, lơngăp lơngai internet, lơh sa mờ măy mŏk rơndeh ô tô mờ lơh sơnơm. Tàm anih cribơyai, Thủ tướng ồng Lê Minh Hưng pà gĭt di dơ̆ lòt còp Việt Nam dơ̆ do, 2 Thủ tướng neh ring bal Jơnau yal bơr bal bè broă tơngguh kâp gĭt gơ̆p Việt Nam mờ Slovakia gơguh tus Tam klăc lơh broă bal jŏ jòng; bơh hơ̆ ai Việt Nam gơgơs lơgar bơh sơnrờp tàm tiah đah Jum măt tơngai lik câu Á geh gĭt gơ̆p tam klăc lơh broă bal jŏ jòng mờ Slovakia; pơyua jơnau đơs pràn kơldang bè jơh nùs lơh ngan bơh 2 lơgar dê nàng kờñ lơh gơlik bơta pràn pràn kơldang mờ pờ gơlik dùl ù tiah kwơmàng pa nàng 2 lơgar bal mờ gơ̆p mŭt tàm tŭ tơngai bơtàu tơngguh pa jơnhoa rlau, dờng pràn rlau, jrô ơnàng rlau.