Tàm nùs nhơm bơh uă cau ling yau neh geh tŭ tus bal dơ̆ tam lơh, ală ngai nhai tam lơh nam 1975 kung gam kah sùm bè ờs. Gơwèt mờ ală cau do, tơl ù tiah, tơl gùng lòt tàm tiah Tây Nguyên ndrờm geh bal mờ ală dơ̆ tam lơh cui rơcai ngan mờ bơta phi să bơh git nđờ cau ling tàm mpồl bal. Trung tướng Đoàn Sinh Hưởng, Cau khin cha jăk chài Mpồl ling phào crong làng bol, Atbồ Ling tiah 4 lài do, tŭ hơ̆ là cau atbồ mpồl ling rơndeh sơtăng tàm Trung đoàn 273, Ling mpồl 3, tus tơn tam lơh sơgràm phà Buôn Ma Thuột kung gam kah sùm ală tŭ tàm rài tam lơh hơ̆. “Tài bă ù do neh geh git nđờ nă cau chơ̆t phi să hơ̆ sồng geh pha lin do. Jơnau kờñ Buôn Ma Thuột mờ he neh tơnklàs geh là jơnau kờñ tờm ngan bơh Tam lơh mờ bơh tàm dơ̆ tam lơh pha lin Buôn Ma Thuột hơ̆ sồng lơh geh ală dơ̆ tam lơh ndai. Tŭ do Buôn Ma Thuột, càr Dăk Lăk niam bơnĕ, añ gơlơh kung chờ, chờ bè đah ndai kung kah tus cau ling tàm mpồl bal, kah wơl ală cau neh phi să tài dà lơgar do, tài ù tiah do”.

Bơh pha lin geh nùs nhơm lơh bơnàng jă hơ̆, broă tam lơh tàm tiah đah Jum neh mhar tam gơl, ai geh bơta pràn ală dơ̆ tam lơh pơn jăt tai in mờ wèt tus tam lơh pha lin dờng kàl Prang nam 1975. Jăt ală cau lơh broă kơlôi sơnơng broă ling klàng đơs, Tam lơh Tây Nguyên ờ mìng là dùl pha lin dờng bè ling klàng mờ gam lời wơl uă jơnau bơsram geh bơta kwơ bè bơta chài đơng lam tam lơh mờ bơyai lơh tam lơh. Phó Giáo sư, Tiến sìh Hoàng Xuân Nhiên, lơh broă tàm Hìu bơsram kơlôi sơnơng Sền gàr Dà lơgar, cau gĭt wă jrô kơlôi sơnơng bè bơta chài broă ling klàng Việt Nam dê đơs là, dùl tàm ală bơta niam krơi is bơh Tam lơh Tây Nguyên dê là bơta chài ai ling tus, ai geh bơta kwơ màng. “Tàm Tam lơh Tây Nguyên den broă ai ling tus lơh geh bơta pràn là dùl tàm bơta niam krơi is geh pơnrơ ngan, mờ do kung là dùl jơnau bơsram kwơ màng ngan ai broă gàr dà lơgar bơh jơi bơtiàn he dê tàm rài pa. tàm broă bơtàu tơnguh bơta chài broă ling klàng Việt Nam tàm bơta pa gam pal pơn jăt tai kơlôi sơnơng, gam pal tơnguh rơlao tai ală bơta kwơ mờ ală cau lài do neh lơh gơs, nàng he in geh ală tam lơh jai pha pa pơnrơ dờng rơlao. Mờ gàr dà lơgar he dờng pràn sùm, sền gàr dà lơgar bơh gờñ bơh ngài”.

Rơlao nggùl rài tơnơ̆ mờ tam lơh jai pha kwơ màng hơ̆, Tây Nguyên neh geh uă tam gơl. Ală bă ù neh geh tŭ là tiah tam lơh cui rơcai ngan neh gơs ală bă ù lơh sa suơn sre dờng, uă gơl gùng lòt geh rề ơnàng, ală tiah drà gam rơhời geh lơh gơs, rài kis bơh làng bol ală jơi bơtiàn ngai sơlơ gơguh. Gơwèt mờ ală cau ling neh geh tŭ tus tam lơh nam lài do, bơta tam gơl bơh uă ù brê bơnơm dờng do là cơng tàng pà gŏ loh làng ngan bơta kwơ bơh ală phi să tàm rài tam lơh. Đại tá Nguyễn Đức Tính, Lam bồ mpồl tàm yal tơnggĭt Tiểu đoàn 401 Dăk Lăk, do là mpồl ling neh geh tŭ dờp kơnòl tam lơh nàng kơrian ling sò tơm dô bơh càr Dăk Lăk tus càr Lâm Đồng tàm Dơ̆ tam lơh Tây Nguyên pà git: “Tơnơ̆ tŭ tơnklàs jơh den chờ hờp ngan, tus tŭ do di lah pơn drờm mờ lài do là ờ gơtùi ngan. Kơ̆p kờñ là dà lơgar bơtàu tơnguh jăt Jơnau lơh nền tàm Pơrjum dờng Đảng dơ̆ XIV dê den gŏ Đảng mờ Dà lơgaar lơh ngan geh khà gơguh lơh sa 2 sồ bơh nam 2026 mờ rơcang ai dơ̆ tĕ khà cau ala măt Quốk hội dơ̆ XVI mờ Mpồl duh broă Làng bol ală kấp den añ pin dờn dà lơgar he rơ̆p bơtàu tơnguh, rài kis oh kòn he rơ̆p gơboh gơbài rơlao”.

Ờ mìng là nùs nhơm pơnyờ să bơh ală cau ling lài do dê, Tam lơh jai pha Tây Nguyên gam lơh gơs bơta kờñ ai rơnàng kơnòm să tŭ do in. Lŏ Vũ Mai Hương, cau bơsram dờng rơlao Adăt boh lam tàm hìu bơsram Đại họk Adăt boh lam Hà Nội, tàm càr Dăk Lăk pà git, ală jơnau bơh tiah tam lơh lài do dong kờl rơnàng kơnòm să git wă loh làng rơlao bơta kwơ bơh ring lơngai mờ kơnòl bơh să tờm dê gơwèt mờ ƀòn lơgar, dà lơgar dê. “Bơh tàm jơnau bơsram bal mờ ală jơnau yal bè Tam lơh Tây Nguyên nam 1975, bol añ rơnàng kơnòm să neh wă nền nòn rơlao bè ală phi să bơh rơnàng lài do dê. Bơta do dong kờl bol añ git jơnau rơlao mờ ală bơta kwơ bơh ring lơngai tŭ do dê, kung git loh rơlao bơnah kơnòl bơh să tờm dê tàm broă pơgồp bal bơ̆t bơtàu, bơtàu tơnguh ƀòn lơgar”.

51 nam neh rơlao, mơya nùs nhơm bơh Tam lơh Tây Nguyên kung gam pơn jăt tai lơh geh uă. Bơh tiah tam lơh nam lài do tus mờ broă bơtàu tơnguh tŭ do, bă ù tiah brê bơnơm dờng gam lơh geh ală bơta pa mờ jơnau kơ̆p kờñ brồ guh, mờ bồ tơngoh bal mờ nùs nhơm pin dờn tàm rài tơnơ̆ do bơtàu tơnguh kơl jăp dà lơgar.