Tàm sơnah ƀòn Phan Thiết, sơnah ƀòn tàm gùl tiah dà lềng càr Lâm Đồng dê, tàm ală ngai do, jơnau bè tĕ khà sùm geh tàm ală ƀòn ơm kis. Cau tĕ khà tus bal nàng jòi sền, nàng git bè khà măt, rài kis broă lơh bơh ală cau tơlik măt tĕ khà dê nàng rơwah geh ală cau ala măt di pal. Gơwèt mờ làng bol kis tàm tiah do, lòt tĕ khà ờ mìng là gơnoar kwơ mờ gam là kơnòl bơh làng bol dê gơwèt mờ dà lơgar.

Ồng Trần Hữu Trung, tàm Mpồl ƀòn drà 14, sơnah ƀòn Phan Thiết pà git: “Lài ngan là tàm hìu nhă làng bol ƀòn lơgar, tiah ƀòn ngai Rơlô ai rơndăp broă lơh hơ̆ sồng lòt tĕ khà tơl. Tàm do bơhiàn bơh lài do tus tŭ do, tàm nggùl ngai là broă tĕ khà geh bơyai lơh sir. Làng bol, cau tĕ khà kơ̆p kờñ ngan là jơh ală cau geh nùs nhơm niam, jăk chài nàng đơng lam Làng bol mờ tàm hơ̆ uă ngan là tàm tơngai lơh broă do là tam gơl pa bồ tơngoh, den tàng cau tĕ khà chờ hờp ngan”.

Nùs nhơm rơcang ai ngai tĕ khà kung gam lơh geh uă tus tàm ală tiah bơnơm ñhoa càr Lâm Đồng dê. Tàm thôn Long Lanh, sàh Lạc Dương, do là thôn làng bol kòn cau K’ Ho ơm kis, ală jơnau yal bè tĕ khà geh làng bol sền gròi ngan, cri bơyai bal tàm ală dơ̆ pơrjum mpồl bơtiàn mờ tàm tơl hìu nhă dê. Lŏ Dà Ju K’ Tim pà git: “Tŭ tìp bal ală bơyô kung bè boh bơr tàm hìu nhă den añ kung mờng bơyai mờ bơto tai ờ uă tơngu me gơrềng tus tĕ khà. Bè tơngai tĕ khà, ală cau tơlik măt tus bal dơ̆ do mờ anih đùh sră. Tơngai lơh broă dơ̆ do là dùl tơngai lơh broă kwơ màng ngan, añ kung kơ̆p kờñ añ mờ ală cau tĕ khà ndai rơ̆p rơwah geh ală cau mùl màl geh nùs nhơm niam, jăk chài mờ geh kơnòl, geh broă tam gơl pa nàng bơ̆t bơtàu Dà lơgar làng bol dê, geh làng bol mờ tài làng bol”.

Bơh tàm tiah dà lềng tus tiah bơnơm ñhoa càr Lâm Đồng dê, jơh ală ndrờm gam wèt tus ngai tĕ khà cau ala măt Quốk hội khoă XVI mờ cau ala măt Mpồl duh broă Làng bol ală kấp tơngai lơh broă bơh nam 2026 tus 2031 mờ nùs nhơm pin dờn bal mờ kơ̆p kờñ uă ngan. Ngai 15 nhai 3 geh rơlao 2 tơlăk 700 rơbô nă cau tĕ khà tàm càr Lâm Đồng dê mờ tơl pang sră geh kơlôi sơnơng nền nòn, rơwah geh nền nòn là bơta pơyoa nùs nhơm pin dờn bơh Làng bol dê tàm ală cau ala măt di pal ngan, ală cau geh nùs nhơm niam, jăk chài, jơh nùs drơng broă Dà lơgar mờ Làng bol in.