Tàm dơ̆ bơyai lơh, ală cau ala măt neh pơdơng bơkàu, chu ñàng kah kơlôi mờ lời tŭ jiơ kah kơlôi tơlik nùs nhơm jơh nùs ki ngàm, kah rơngal uă ngan gơ wèt mờ 64 nă kwang bàng, cau ling Ling dà lềng Làng bol Việt Nam neh khin cha jak chài tam lơh, phi să tàm broă lơh sền gàr gơnoar tờm dà lềng, bồt dờng màng bơh Dà lơgar tờm dê.

Tơnơ̆ dơ̆ bơyai lơh pơrjum kah kơlôi, mpồl neh chu ñàng tàm tiah bơtô ƀồc càl, lòt còp tiah ràng tơlik phan bơna mờ anih prăp gàr phan kwơ yau ờm tàm tiah kah kơlôi, tiah prăp gàr wơl uă sră kir sơnrai, phan lời kir gơ jăt bal mờ rài kis mờ bơta phi să bơh ală cau ling dê tàm dơ̆ tam lơh sền gàr bồt Gạc Ma, bồt Trường Sa, càr Khánh Hoà tàm nam 1988. Tiah kah kơlôi cau ling Gạc Ma là “anih pôs đồng kăc màng” geh gơtha is ồn tàm bơto bơtê bơhiàn ờs mờng bơh yau, pơgồp bơnah bơ̆t bơtàu nùs nhơm gơboh lơgar, tơngguh uă gĭt wă sền gàr gơnoar tờm, bồt ai ală rơnàng in.