Đơs pơndŭt dar pơrjum, Tổng Ƀí thư ồng Tô Lâm đơs niam ngan mờ sền bal dùl nùs bal mờ ală jơnau đơs jơh nùs jơh tồr, rềp mờ mùl màl bơh ală cau ala măt tus bal dê mờ ală cồng nha neh lơh geh tàm tơngai lài, pơnrơ ngan là neh lơh gơs bơnah uă kơnòl broă sồr lơh, cèng wơl cồng nha geh kwơ ngan ngồn bơh hơ̆ dong gĭt wă bơh ală ƀộ, gah, ƀòn lơgar dê neh geh uă gơ tam gơl loh làng, rơhời gơ jăt bal broă ngui jak chài măy mŏk tàm broă lơh jăt gơnoar broă kơnòl broă bơh tơl ƀộ gah geh gơrềng dê; neh geh bàr pe broă lơh tơrlòng lài lơh broă bal đah mpồl lơh sa kă bro mờ ală lam bồ anih kơlôi sơnơng geh cồng nha ngan ngồn; is ồn bơta pal cih dờp là tơngai lài geh bơta tus bal jơh nùs ngan bơh mpồl bơtiàn mpồl lơh sa kă bro mờ uă cau jak chài tàm lơgar mờ bơdìh lơgar dê.

Đơs loh 7 kơnòl broă mờ ală Ƀộ, gah, ƀòn lơgar mờ jơh ală anih lơh broă cíñ trị kờñ pal lơh tàm tơngai tus. Tổng Ƀí thư sồr, sơrbăc mhar lơh ndrờm bal ală broă rơndăp lơh bơsong tă bơsong 7 bơta gơkòl tờm ngan neh geh ai gĭt tàm jơnau yal, mơkung lơh pràn broă ngui ală broă lơh geh jak chài dê, măy mŏk wèt pràn tàm broă tơngguh uă cồng nha lơh broă, tơngguh uă cồng nha mpồl cau lơh broă, drơng ală broă ătbồ broă bơh mpồl lơh sa kă bro dê.