Tàm thôn Bàu Trúc, sàh Ninh Phước, do là thôn geh tus 95% khà kờp làng bol là kòn cau Prum, broă mblàng yal tĕ khà geh lơh tus tơl hìu làng bol. Cau geh bơngă pin dờn tàm thôn bè ồng Đàng Chí Quyết tus tơl hìu nàng lam làng bol tus bal lòt đùh sră. Bơdìh hơ̆ tai, ồng kung bơto sồr cau tĕ khà tus sền nàng git bè broă lơh, jơnau đơs bơh ală cau tơlik măt tĕ khà dê bơh tàm anih yal tơngit tờm lài mờ tŭ đùh sră tĕ khà.

Ồng Đàng Chí Quyết pà git: “Là cau tàm ƀòn den tàng añ wă loh làng ngan bơhiàn ờs mờng bơh làng bol dê. Den tàng añ lòt tus tơl hìu nàng lam sồr, tàm hơ̆ uă ngan là tìp mờ ală cau tờm hìu, cau kơ đơng yàng bal mờ cau atbồ jơi nòi. Bơh tŭ hơ̆ ală cau do pơn jăt tai bơto bơtê wơl ală cau tàm hìu nhă, oh kòn in git bè tơngai, anih đùh sră kung bè broă tĕ khà, nàng làng bol rơwah di ală cau geh nùs nhơm niam, jăk chài ala măt ai bồ tơngoh bal mờ jơnau kơ̆p kờñ bơh cau tĕ khà in”.

Bal mờ làng bol kòn cau Prum, tơngai do ală sàh tàm tiah bơnơm càr Khánh Hoà dê kung lơh pràn broă mblàng yal, lam sồr cau tĕ khà tus bal lòt đùh sră. Tàm sàh Trung Khánh Vĩnh, geh uă broă lơh mblàng yal geh bơyai lơh di pal mờ bơta krơi is tàm tiah jơi bơtiàn ờ gal cau dê. Anih duh broă tĕ khà sàh pơgồp bal mờ kra ƀòn, kwang atbồ ƀòn nàng mblàng yal Adăt tĕ khà mờ dà đơs kòn cau Rơglai, mờ bơto sồr làng bol jòi sền nàng git khà măt bal mờ jơnau đơs bơh ală cau tơlik măt tĕ khà dê. Uă broă lơh bè lơh pơgăp kung geh ai lơh nàng ală mpồl tĕ khà in git mờ wă tàm broă bơsong ală bơta gơlik geh tàm mùl màl.

Mò Cao Thị Ngọc Thanh, Củ tịc Anih duh broă Làng bol sàh Trung Khánh Vĩnh pà git: “Bol añ bơyai lơh đơs crih tamya, dròng cing nàng hòi jà làng bol tus bal sền, bơh tŭ hơ̆ pơgồp bal tàm broă mblàng yal bè bơta kwơ bơh dơ̆ tĕ khà. Bơh ală broă lơh do, làng bol wă là tĕ khà ờ mìng là kơnòl làng bol dê mờ gam là ngai chờ bơh gùt làng bol dê tai”.

Ală broă lơh ndrờm bal, bơceh lơh tàm càr Khánh Hoà neh dong kờl làng bol lơh tờm tàm broă jòi sền nàng git broă lơh, kơlôi sơnơng nền nòn nàng rơwah geh ală cau ala măt geh tơl nùs nhơm niam, jăk chài. Nùs nhơm chờ hờp wèt tus ngai tĕ khà lơh geh bơh tiah bơnơm tus tiah jăt gah dà lềng càr Khánh Hoà dê, neh rơcang tơl ai ngai chờ dờng gùt làng bol in.