Tiah pơrjum sồ 2 Hìu sơnơm uă gah tiah Tây nguyên ală ngai do àng gơcrà ƀồng bi pơr hê. Do là tiah tĕ khà sồ 44 gơwèt Anih duh broă tĕ khà sơnah ƀòn Buôn Ma Thuột, càr Dăk Lăk dê. Ƀák sìh Nguyễn Ngọc Thịnh, Phó Kwang lam bồ hìu sơnơm, Lam bồ Mpồl tĕ khà tàm Hìu sơnơm, pà gĭt, tus tŭ do, tơl broă lơh ai dơ̆ tĕ khà in neh crăp rcang:“Tơl mpồl cau lơh broă hìu sơnơm bơh bol añ dên neh dờp geh pang sră tĕ khà. Tàm hìu sơnơm geh dùl bơta krơi is rơmis là cau kòp mờ hìu bơnhă cau kòp ơm ing tàm do, den tàng Mpồl tĕ khà hìu sơnơm dê ai 2 nă oh mi drơng broă hòm sră đùh ntrờn làm bă tiah, cèng tus tơl cơldŭ cau kòp in nàng ală cau tĕ khà là cau kòp ờ gơtùi lòt rê gơtùi đùh sră tàm cơnờng kòp tơn”.

Điều dưỡng bi Nguyễn Thị Cẩm Vân, pà gĭt, do là dơ̆ 3 bi tus bal tĕ khà tàm Hìu sơnơm tơn. Bulah broă sền gròi cau kòp ờ ru ngan, mơya gơ jal tŭ jiơ ơm rlô, bi sùm tus tiah lĭp mat cau tĕ khà mờ rài kis cau tơlik mat tĕ khà nàng jòi gĭt jơnau yal tơngĭt. Bi kơ̆p kờñ sac rơwah geh ală cau geh tơl bơta jak chài, tơl nùs nhơm niam nàng pơyoa jơnau kơ̆p kờñ bơh he dê:“Añ kơ̆p kờñ rơwah geh ală cau ala mat geh nùs nhơm niam, là rƀàng tàm tơrbŏ bal đah gah lơh sơnơm mờ Đảng, Dà lơgar. Ală oh mi hơ̆ rơ̆p ala mat ai nùs nhơm, bơta kơ̆p kờñ bơh bol añ dê; mơkung là jơnau đơs bơh bol añ dê bơh ală oh mi hơ̆ rơ̆p tus mờ Đảng, Dà lơgar nàng sền gròi rlau tai, bơcri priă lơh phan bơna bơt bơtàu ai hìu sơnơm in niam rlau tai nàng drơng pràn kơl dang să jan làng bol càr Dăk lăk in niam rlau tai”.

Hìu sơnơm uă gah tiah Tây Nguyên geh bơta ơnàng 1 rơbô 200 nơm cơnờng mờ rlau 1 rơbô 250 nă kwang bàng, y ƀák sìh, cau lơh broă. Tàm dơ̆ tĕ khà ngai hìng, cau tĕ khà là kwang bàng, cau lơh broă  bal mờ gĭt nđờ rơbô nă cau kòp mờ hìu bơnhă cau kòp dê gam ơm ing, sơm kòp tàm hìu sơnơm rơ̆p tus bal lòt đùh sră tàm tiah tĕ khà sồ 44, gơwèt Anih duh broă tĕ khà sơnah ƀòn Buôn Ma Thuột, càr Dăk Lăk. Mờ bơta rcang lài niam ngan, dơ̆ tĕ khà tàm tiah tĕ khà “is ồn” do rơ̆p geh bơyai lơh geh cồng nha, lơngăp lơngai mờ di mờ jơnau sồr.