Dơ̆ lòt còp ngan ngồn lơgar Cộng hoà Tây bơh ồng Tô Lâm- Tổng Bí thư, Chủ tịch lơgar dê là tŭ niam nàng Việt Nam mờ Tây in sơlơ tơnguh rlau tai lơh broă bal tàm ală gah mờ lơgar Tây geh bơta pràn bè năng lượng, phan bơna bơt bơtàu kwơ màng, gùng lòt rê tiah drà, gah rơndeh par kơl wàng trồ, drơng mờ tam gơl nhơm trồ tiah; mơkung pờ ơnàng tus ală gah di pal mờ jơnau kờñ bơtàu tơnguh bơh lơgar Việt Nam dê bè, jak chài, măi mok, gah rơndeh par kơl wàng trồ, măi mok drơng tam gơl sồ, bồ tơngoh jak kòn bơnus lơh gơlik.

Dơ̆ lòt còp rơ̆p pơgồp bơnah sơlơ tơnguh tai gĭt gơ̆p lơh broă bal Tam klăc lơh broă bal jŏ jòng tơl làm đah Việt Nam mờ Tây gơ lòt mut tàm broă lơh mùl màl, ngan ngồn mờ geh cồng nha. Bơh hơ̆, pơgồp bơnah lơh geh bơta pràn gơn kơnờm pa ai bơtàu tơnguh bơh Việt Nam dê in nàng kờñ bơt bơtàu dà lơgar pas gơs tàm rài tơnơ̆ mờr tus mờ đơs nền bơngă niam bơnĕ bơh lơgar Việt Nam dê tàm muh mat ală lơgar.