Thôn Hiệp Đồng, sàh Hòa Xuân là tiah đah đơm dà dờng Bàn Thạch. Tàm dơ̆ dà tih dà lìu dờng ngan ờ hềt bơh lài tàm nam lài, git nđờ jơt nơm hìu gơtìp dà wềl, jơh gùt ƀòn gơ bam tàm dà, uă hìu bơnhă ndrờm bè roh jơh tơn. Ală nam lài, pah tŭ mìu dờng, dà tih sùm gơ lìu tàm tiah làng bol ơm kis. Bè hơ̆ den tàng tŭ ƀòn lơgar geh jơnau lơh nền lơh hìu pleh dà tih dà lìu mpồl bơtiàn mơya ờ gam ù tia, hìu bơnhă ồng Nguyễn Văn Liễm neh ai is rlau 400 thơk vuông ù, gơ ơm tềng sơnĕ pe gùng lòt ală thôn nàng lơh hìu pleh dà tih dà lìu:

“Añ kung geh dùl bă ù gơ ơm tàm sơnĕ pe gùng. Ơnàng mờr 1 rbô 760 thơk vuông. Añ ai is ù, lơh kàr lơi den lơh, gam kàr lơi den gam, ờ duh pal geh halà dan bơta lơi mờ dà lơgar. Să tờm añ ngoh rơngac ngan, he ai is mơya he chờ hờp. Tơnơ̆ do, ờ mìng is să tờm hìu bơnhă añ mờ jơh gùt ƀòn hơ̆ sồng tus rài kòn, rài sau, rài set rơp geh anih nàng pleh dà tih dà lìu, pleh càl rbut dờng”.

Tàm thôn 1, sàh Xuân Lãnh, hìu bơnhă ồng Nguyễn Văn Lang, gùt nam kung gam kal ke mờ rài kis mơya kung ai is 300 thơk vuông ù nàng lơh hìu pleh dà tih dà lìu mpồl bơtiàn. Bơnah ù ai is là dùl jơtài dờng ngan gơ wèt mờ dùl hìu bơnhă gam uă kal ke. Mơya tơnơ̆ dà tih dà lìu nam 2025, sền gŏ làng bol pal dô pleh dà tih dà lìu, ồng lơh nền lời ai ù hìu bơnhă dê ai broă lơh bal in: “Nam 2025 dà tih dà lìu bòl glar ngan, den tàng rơngòt ngan, tus nam 2026, oh mi tàm hìu gŏ sơnđàc ngan, bè hơ̆ den tàng tŭ do he kung ai is ù nàng lơh anih ơm pleh dà tih dà lìu làng bol tàm ƀòn in”.

Bơh bơnah ù hìu bơnhă ồng Lang dê, dùl nơm hìu pleh càl rbut dờng, dà tih dà lìu mpồl bơtiàn kơnhăp kơ̆ neh geh lơh. Hìu geh lơh 2 cờn, rơkàng jơnhau, ờ mìng là anih ơm pleh tŭ trồ tiah lơh aniai mờ gam là anih bơ tòm tơrgùm mat bal làng bol dê. Ồng Lê Văn Đông, Lam bồ thôn 1, sàh Xuân Lãnh pà git, 97 hìu bơnhă làng bol kis jat gah dà croh tàm thôn 1 tŭ do neh geh tai dùl anih ơm pleh lơngăp lơngai tŭ mìu dờng, dà croh gơguh tih: “Ồng Nguyễn Văn Lang kis tàm ƀòn lơgar geh nùs nhơm tàm gơboh bal mờ làng bol den tàng neh ai is nàng làng bol in geh tiah lơh hìu Rông mpồl bơtiàn bơtòm tơrgùm mat. Làng bol kung chờ hờp ngan tài geh anih ơm pleh dà tih dà lìu nisơna gơlik geh tàm ƀòn lơgar”.

Tus tŭ do, mờr 100 nơm hìu pleh dà tih dà lìu mpồl bơtiàn neh geh lơh tàm ală ƀòn lơgar kuơmàng ƀuơn gơtìp gơ rềng càr Dăk Lăk dê, tàm hơ̆ geh mờr 2 sàu ù bơh 5 hìu bơnhă làng bol ai is. Gơ wèt mờ ală hìu bơnhă làng bol gam uă kal ke, hơ̆ ờ mìng là bơta tă pơgồp bè phan bơna mờ gam là nùs nhơm, kơnòl mờ mpồl bơtiàn. Tài tŭ trồ tiah lơh aniai gơlik geh, bơta kuơ màng là tàm nùs nhơm crăp rơcang tam pà bal, bal mờ làng bol sơrlèt gan kal ke, rềs àr.