Geh mat tàm dơ̆ sơn đờm ai rơndeh lòt rê Rơndap broă lơh gùng rơndeh lòt mhar Khánh Hòa – Buôn Ma Thuột tàm ngai 19/12 pa do, gal ngan làng bol tàm ƀòn lơgar chờ hờp ngan tŭ ală gơl gùng dờng geh ai rơndeh lòt rê; kơp kơnờm gơtùi tơrmù lơyah tŭ jơ lòt rê, lơh gơlik bơta ƀuơn ai broă kă bro, bơtàu tơnguh lơh sa, lòt nhơl mờ tơnguh priă lơh geh. Ồng Nguyễn Văn Hạ, ơm tàm sàh Ea Knuêc geh rlau 4 sàu ù gơ ơm tàm bă ù ai wơl nàn lơh rơndap broă lơh ngoh rơngac đơs: “Bơta do là bơta kơp kờñ bơh làng bol tàm do dê, chờ hờp ngan, tŭ do geh gùng rơndeh lòt mhar, drơng kă bro phan, lòt rê, phan lơh gơs bơh suơn sre làng bol dê geh rơndeh rơndồ mut tàm suơn nàng nàng pik tơnhàu den priă lơh geh bơh phan lơh gơs bơh suơn sre dê lài ngan gàr bơta niam, dơ̆ 2 là giă tac gơguh jơnhua rlau”.

Ờ mìng pờ gùng ai broă lòt rê in, gùng rơndeh lòt mhar gam lơh gơlik bơta ƀuơn bơtàu tơnguh pa ai ală tiah tam uă phan in. Mò Ngô Thị Minh Trinh, Ƀí thư Anih duh broă Đảng sàh Ea Knuêc – là tiah geh gùng rơndeh lòt mhar lòt gan mờ 6 anih tàm tìp, mờ kung là tiah tam sầu riêng uă ngan rlau jơh càr dê, mờ rlau 5 rbô 100 lồ đơs là: “Jat añ den bơh ală anih tàm tìp hơ̆ den geh bơta tàm tơrbŏ bal kă bro mờ geh bơta tàm tơrbŏ bal lơh sa mpồl bơtiàn mờ niam chài tai. Lài do, kơnhoàl Krông Păk yau bol hi dê neh rơndap ù tiah kụm lơh sa mờ măi mok bơh Tân Tiến dê, bơdìh hơ̆ tai là tiah logistics nàng geh bơta tàm tơrbŏ bal nền nòn mờ ngui jơh bơta pràn, bơta ƀuơn bơh tơl tiah dê nàng tàm tơrbŏ wơl gơ gơs dùl ù tiah nàng bơtàu tơnguh lơh sa mpồl bơtiàn sàh dê”.

Rơndap broă lơh dềt sồ 3 gùng rơndeh lòt mhar Khánh Hòa – Buôn Ma Thuột jòng 48 kơi sồ, lòt gan 7 sàh, geh gơnoar broă là gơl gùng kuơmàng ngan tơrbŏ Tây Nguyên mờ tiah kềng gah dà lềng đah jum tàm gùl lơgar. Bal mờ hơ̆, rơndap broă lơh gùng Hồ Chí Minh gơl gùng pleh tiah đah mat tơngai lik Buôn Ma Thuột jòng mờr 40 kơi sồ gam pơgồp bơnah tơrmù ƀà rơndeh lòt rê gan tiah tờm, tơnguh cồng nha ngui ală gơl gùng lòt tàm tơrbŏ bal ală tiah.

Tàm tiah đah mat tơngai lik càr Dăk Lăk, tơnơ̆ rlau 10 nam kơp gơn, rơndap broă lơh tiah lòt nhơl ơm rlô să kas màng Cù Lao Mái Nhà neh ngan ngồn sơn đờm lơh tàm lồi nam 2025. Mờ khà ngui ù mờ mat dà mờr 173 lồ, kờp jơh priă bơcri mờr 5 rbô tơmàn đong, rơndap broă lơh geh kơp kơnờm rơp lơh gơlik bơta pràn chồl tơnguh pa ai gah lơh sa mờ măi mok – broă drơng ala in, mờ kung tơn jơh bơta kơlôi rơcang pơhì pơhà ù lòt nhơl bềng bơta pràn. Ồng Võ Văn Ngầu, làng bol sàh Ô Loan đơs: “Chờ hờp ngan là rơndap broă lơh neh sơn đờm lam lơh, tài rơndap broă neh geh bơh jŏ, làng bol kơp gơn ngan. Ngai do chờ hờp tus ngoh rơngac tơn tài rơndap broă lơh geh lam lơh den sàh do rơp là tiah niam pơn rơ ngan”.

Ngan ngồn ai gŏ, nàng lơh gơtùi jơnau kờñ gơguh lơh sa 10% rlau hơđang jat Jơnau lơh nền tàm pơrjum bơh càr dê, Dăk Lăk kờñ pal geh ală rơndap broă lơh dờng, geh bơta gơ rề pràn kơldang. Tŭ do,t iah kềng gah dà lềng neh geh 43 rơndap broă lơh geh lơh sră ai gơnoar lam lơh mờ kờp jơh priă bơcri mờr 90 rbô tơmàn đong. Bơta tờm là nùs nhơm kràñ cê bơh ală sờh, gah broă lơh mờ ală tiah dê tàm broă lòt bal mờ mpồl lơh sa kă bro, tă bơsong ală bơta gơ kòl. Do kung là bơta mờ ală cau bơcri priă gam kơp gơn. Ồng Đào Mỹ, Phó Củ tịc Anih duh broă Làng bol càr Dăk Lăk pà git: “Bol hi geh ală jơnau rơcang lài ai bơta gơguh lơh sa in mờ geh jơnau sồr lơh đơng lam tàm tơl broă bơh bơta rơcang lài hơ̆, bol hi rơp sền gròi tơl nam nàng bal mờ gơp brồ guh hờ đap”.

Jat broă rơndap lơh, tiah đah mat tơngai lik càr Dăk Lăk dê rơp pơn jat tai lam lơh uă rơndap broă lơh dờng, tàm hơ̆ geh 3 rơndap broă lơh kuơmàng tàm tiah lơh sa Nam Phú Yên geh: Anih ơhò ơm Bãi Gốc, phan bơna Tiah lơh sa mờ măi mok Hòa Tâm mờ Tiah lơh sa mờ măi mok pa Phú Yên, mờ kờp jơh priă bơcri lơh mờr 5 tơmàn dolar Mỹ tàm bă ù 750 lồ. Ală broă lơh do geh kơp kơnờm ngui bă ù kềng gah dà lềng, lơh gơlik bơta gơn kơnờm ai tiah lơh sa mờ măi mok – bơt bơtàu in pơn jat tai at gơnoar broă lam lài tàm gơguh lơh sa bơh nam 2026 dê mờ ală nam pơn jat tai.