Mìu sơr jŏ tàm uă tiah đah măt tơngai Lik càr Dăk Lăk neh lơh git nđờ rơhiang lồ sre lơh kòi, bùm blàng tàm sàh Hoà Thịnh gơtìp gơbam dà. Jăt gơnoar atbồ tàm sàh do yal, pơgăp 300 lồ bùm blàng mờ rơlao 600 lồ kòi sre gơtìp gơrềng. Sàh neh hòi jà 15 nă đoàn viên ơruh pơnu bal mờ 50 nă kwang bàng, cau ling kwang àng, ling klàng tus tàm suơn, tàm sre nàng dong kờl làng bol mhar tơnhào phan geh lơh bơh broă lơh sa suơn sre dê.

Trung đoàn 888, Mpồl Đơng lam Ling klàng càr Dăk Lăk ai 70 nă kwang bàng, cau ling tus tàm sàh Hoà Thịnh pơgồp bal nàng tơwès kòi, rồ bùm blàng gam tai, tơrmù hoàc huơr tài bơh mìu dà tih. Bal mờ broă dong kờl làng bol, sàh Hoà Thịnh gam lơh gùng dà broă lơh nàng rơcang pleh jăt tơl bơta, rơcang lài mpồl lơh broă, phan lơh broă, gàr niam lơngăp lơngai ai làng bol in mờ tơrmù ờ uă ngan hoàc huơr tài bơh trồ tiah lơh aniai.

Tơnơ̆ mờr 2 poh mìu tàm uă tiah, ngơr bam dà mờ tơrlah ù tàm uă tiah càr Lâm Đồng dê gơlik geh kal ke. Mho ngai 23 nhai 9, Anih duh broă Làng bol càr sồr ală tiah kờp sền, jơh nùs lơh ngan ntrờn làng bol lik bơh tiah geh pơhìn uă gơlik geh dà kŏ dà cò, tơrlah ù; mơkung tus tàm ală tiah gơtìp tam cah is, gàr niam phan sa, phan kờñ ngui, ờ gŏ di lời làng bol jơgloh.

5 sàh kong gơrềng kơn jơ̆ ngan geh: Cát Tiên 2, Cát Tiên 3, Quảng Khê, Đam Rông 2 mờ Quảng Sơn geh sồr hòi jà mpồl cau, rơndeh rơndồ măi mok dong kờl làng bol. Mìu dờng dà tih neh lơh pơgăp 60 nơm hìu gơtìp gơrềng, rlau 1 rơbô lồ phan tam ngơr băm tàm dà; mìng is sàh Hàm Kiệm geh pơgăp 400 lồ thanh long gơtìp ngơr jrô tàm dà. Koèl kơh Gia Bắc tàm gùng dờng Dà lơgar 28 pơn jat tai tơrlah, lơh gơrềng tus broă lòt rê. Ờ hềt cih dờp hoàc huơr bè cau.