Ală ngai bồ nam pa 2026, tàm nùs nhơm nggồr chờ bơh nam pa tiah Tây Nguyên dê, ồng Trịnh Văn Bình, 69 sơnam, Lam bồ Mpồl cau ling yau thôn Đoàn Kết, sàh Ia Hiao, càr Gia Lai neh ai is mŭt nàng pờng tơrlah pơn gàr hìu nhă tờm nàng ai ù rề ơnàng gùng lòt. Ồng Trịnh Văn Bình pà git, ai ù lơh gùng là broă pơgồp bal mùl màl bơh hìu nhă bal mờ làng bol tàm thôn dê, nàng bơ̆t bơtàu ƀòn lơgar pa. “Jăt gùng dà broă lơh tàm broă bơ̆t bơtàu ƀòn lơgar pa, añ gŏ gơdờp ngan mờ gùng dà broă lơh bơh Đảng bal mờ nùs nhơm làng bol dê den tàng hìu nhă añ neh ring bal ai ù tàm broă lơh tàm ƀòn lơgar dê. Mờ nùs nhơm tài mpồl bơtiàn, mpồl bơtiàn tài să tờm he, rơndăp broă lơh rề ơnàng gơl gùng do là ƀuơn ngan ai làng bol tàm thôn đơs bal mờ hìu nhă añ đơs is. Lòt rê lơngăp lơngai, ƀuơn niam, lơh sa gơmù priă tă, priă geh uă den rài kis làng bol geh gơguh”.

Sàh Ia Hiao, càr Gia Lai geh crơng gơs tàm tơngu me tơmŭt bal bè ờs bơh 3 sàh là: Ia Peng, sàh Chrôh Pơnan mờ sàh Ia Hiao, kơnhoàl Phú Thiện lài do. Ai broă lơh phan bơna gùng lòt là broă lơh pràn nàng bơtàu tơnguh lơh sa tàm tơngai bơh nam 2025 tus 2030, Đảng ủy, gơnoar atbồ sàh Ia Hiao neh tơrgùm lam làng bol ai ù, ai phan nàng rề ơnàng broă lơh gùng lòt tàm ƀòn lơgar. Ồng Đỗ Văn Điền, 63 sơnam, kis tàm thôn Đoàn Kết chờ hờp pà git, geh broă dờp bal bơh làng bol dê den tàng broă ai ù lơh gùng neh mhar ai geh dùl broă lơh jrô ơnàng làm gùt tiah. “Gùt làng bol dờp bal, den tàng chờ hờp ngan, geh bơta do là broă sền gròi bơh Đảng mờ Dà lơgar, bơh gơnoar atbồ sàh mờ ală kấp đơng lam bồ den tàng pơnyờ să ngan. Jơh ală broă là geh làng bol ring bal, dùl nùs bal, jơh ală geh pơgồp bal bơta pràn den hơ̆ sồng lơh gơs dùl broă niam bơnĕ bè tŭ do”.

Mìng tàm tơngai ờ jŏ, bơh lồi nam 2025 tus tŭ do, sàh Ia Hiao neh lơh gơs 22 gơl gùng, lam 207 hìu làng bol ai rơlao 38 rơbô thơ̆k vuông ù, rơlao 6 rơbô 200 thơ̆k vuông pơn gàr bal mờ uă broă lơh kơl jăp ndai, mờ kờp jơh priă lơh gơs rơlao 4 tơmàn 800 tơlăk đong. Pal kah ngan, tàm broă lơh do, kwang bàng, đảng viên sùm là mpồl lam lài bơh tàm ală broă lơh mùl màl. Ồng Siu Hiếu, Phó Củ tịc Anih duh broă Mặt trận dà lơgar sàh Ia Hiao, là cau kis tàm thôn Sô Ma Lơng A pà git, broă ai ù gơwèt mờ hìu nhă ồng lài ngan kung tìp uă kal ke sơl, tài bơnah ù rềp tềng gùng geh kwơ màng ngan.

Mơya, jơnau git wă loh làng kơnòl broă bơh dùl nă cau lơh broă đah mặt trận dê, den tàng ồng neh lơh ngan ai ù lài: “Gŏ gùng dà broă lơh di pal ngan, să tờm añ kung lơh jăt broă ai ù nàng rề ơnàng gùng lòt nàng ai geh bơta niam làng bol in. lài ngan kung gơtìp kal ke sơl tàm broă pơlam kòn bao, tài priă ù di lah kờp tŭ do roh 200 tơlăk tàm 1 thơ̆k, mơya gŏ gùng dà broă lơh di pal mờ să tờm añ kung là củ tịc mặt trận sàh lơh broă mblàng yal nàng làng bol in git, den să tờm añ kung pal là cau lam lài lơh jăt broă ai ù lơh gùng nàng ală hìu gam tai in đờm jăt bal. Tơnơ̆ mờ tŭ neh rề ơnàng gùng lòt mờ kloh niam, geh brong tơlik dà niam hìu nhă añ chờ hờp ngan”.

Mùl màl pà gŏ, nàng lơh pràn broă bơtàu tơnguh phan bơna gùng lòt, kes priă ờ uă bơh sàh Ia Hiao dê ờ tơl nàng tơm broă ntrờn ù tiah. Tềng đăp mờ bơta lòng do, Đảng ủy sàh neh ai kơnòl broă bơtàu tơnguh gùng lòt tàm Jơnau lơh nền tàm pơrjum, mờ rơwah gùng dà broă lơh nàng pơlam bơta pràn tàm làng bol, ai bơta ring bal bơh làng bol lơh tờm. Cơng tàng loh làng ngan là geh uă gơl gùng bè Yên Phú 1, Yên Phú 2, Đoàn Kết, Sô Ma Lơng bơh gơl gùng ơnàng tơl 3 thơ̆k, tŭ do neh geh rề ơnàng tus 8 thơ̆k. tàm hơ̆, kes priă Dà lơgar bal mờ ală priă tă di mờ adăt boh lam dong kờl 90%, làng bol tă geh 10% mờ jơh bă ù geh tơm ntrờn.

Ồng Phạm Văn Phương, Ƀí thư Đảng ủy, Củ tịc Mpồl duh broă Làng bol sàh Ia Hiao đơs: “Ai broă tam pà là pal loh làng mờ tơnguh uă ngan gơnoar lam lài bơh mpồl kwang bàng đảng viên dê. Pơgồp bal broă tam pà mờ jào kơnòl broă hơ̆, bol añ neh rơwah ală hìu kwang bàng đảng viên lơh lài. Thôn lài ngan lơh là thôn Sô Ma Lơng A, tơnơ̆ mờ hơ̆ tus ală thôn ndai, uă ngan thôn neh lơh gơtùi, pa do bol añ neh lơh geh 22 gơl gùng bơh ală khà priă pơgồp bal mờ ală priă geh lơh ngan nàng geh, mờ dờp nàng lơh ai làng bol tàm sàh in”.

Ală gơl gùng pa geh lơh ờ mìng ơnàng tàm broă lòt rê, mờ gam pờ geh gùng dà bơtàu tơnguh pa ai tiah ƀòn lơgar càr Gia Lai in. Muh măt sàh Ia Hiao tàm ală ngai bồ nam pa niam bơnĕ, kloh niam, nùs nhơm pin dờn bơh làng bol dê gơwèt mờ gơnoar atbồ geh kơl jăp. Bơh tàm broă dùl nùs bal bơh Đảng mờ làng bol dê, dùl bơta pràn pa gam geh uă, kơl jăp mờ pràn kơl dang, lơh geh tai ală bơta niam bơnĕ bè ƀòn lơgar pa tàm tiah kơh bơnơm Gia Lai dê.