Tơnơ̆ tŭ yal dồ êt bè ală cồng nha pơn rơ ngan bơh dà lơgar dê tàm jơh ală gah broă, Tổng Ƀí thư ồng Tô Lâm pà git, tơnơ̆ pơrjum dờng dơ̆ XIV dồ ròt ală kơnòl broă tờm tàm broă lơh bơt bơtàu Đảng rơp geh lam lơh jat ndrờm bal bè tam gơl, bơ tơl mờ ai lơh jat ndrờm bal ală jơnau pơlam, jơnau sồr bè lơh jat Jơnau pal jat Đảng dê mờ broă lơh sền sơ wì, jat sền bơh Đảng dê; pơn jat tai tam gơl pràn broă lơh kwang bàng jat gùng dà ngan ngồn loh làng, song dơpă; rơ wah di cau, jàu di broă, ai cồng nha broă lơh, bơta pin dờn bơh làng bol dê mờ cồng nha ngan ngồn lơh bơta đo was tờm ngan, halà bè lam lơh jat ală broă lơh sơlơ tơnguh tai broă lơh rơcang lài mờ kơryan sa kuề sa kuà, pơhề pơhà, broă ờ niam; rơcang lài kơryan bơta gơ plơ̆ gơ huc bồ tơngoh cíñ trị, niam chài rài kis, ală tềl tơnggŏ “lơh gơlik is, lơh tam gơl is” tàm dơlam is mpồl.

Đơs sùm dùl dơ̆ tai, Đảng, Dà lơgar sùm sền dờng màng ală tă pơgồp dờng ngan bơh ală kwang đơng lam bồ, kwang đơng lam bồ lài do jat ală tŭ tơngai, Tổng Ƀí thư kơp kờñ pơn jat tai dờp geh ală jơnau đơs tă pơgồp kuơmàng bơh ală kwang geh jơng Đảng dà lơgar lài do dê nàng dong Mpồl duh broă Đảng dà lơgar, Ƀộ Cíñ trị, Mpồl đơng lam Đảng dà lơgar khoă XIV pơn jat tai lơh sir gùng dà, broă lơh, bơta dong kờl mờ tơnguh rlau tai bơta niam đơng lam, sồr lơh, lam dà lơgar cơnđuà kơ̆ bơtàu tơnguh kơnhăp kơ̆ tàm tơngai tus.