Tàm sơnah ƀòn Phú Yên, do là dùl tàm ală sơnah ƀòn gơtìp gơbam dà jrô ngan, tơnơ̆ mờ tŭ dà soăt, Anih lơh broă drơng ala sră nggal dà lơgar neh mhar lơh broă wơl nàng drơng broă làng bol in. Pah ngai, mpồl lơh broă do dờp rơlao 100 pang sră, mìng là kĭ sră nggal, sră ù tiah, sră hìu nhă. Mò Hồ Thị Bước, kis tàm thôn Lộc Đồng pà git, dơ̆ dà tih dà cò neh lơh gơbam tus rơkàng hìu tơn, jơh ală phan bơna bal mờ sră pơ-àr hìu nhă ndrờm gơtìp dà cò pơrdô jơh.

Nàng geh tơngu me bơsong broă tam phà ù tiah tàm anih cah rơña, mò pal tus sơnah ƀòn nàng lơh wơl sră yal chơ̆t bơklao mờ kòn. “Añ kơ̆p kung mhar sơl ờ gŏ jŏ ờ, tài añ tă sồ tus tàm bơta lơi den lơh tàm bơta hơ̆, ală kwang bàng lơh broă di ngan, bơto sồr añ lơh wơl sră, kwang bàng chờ hờp lơh sră añ in”.

Nàng tơrmù tơngai kơ̆p mờ dong kờl làng bol tàm bơta kal ke tơnơ̆ mờ dà tih dà cò, gơnoar atbồ sàh neh hòi jà tai uă kwang bàng tus nàng lơh broă, bơsong sră pơ-àr gơnoar atbồ dà lơgar in. Bơdìh mờ kwang bàng, kông cứk lơh broă tờm, cau lơh broă bưu điện kung geh hòi jà tus sơl tơn tàm mpồl lơh broă dùl mpồng. Lŏ Huỳnh Thị Lệ Chi, cau lơh broă Bưu điện sơnah ƀòn Tuy Hoà geh sồr tus dong kờl tàm anih lơh broă sră pơ-àr gơnoar atbồ lơgar sơnah ƀòn Phú Yên pà git, broă tơrgùm tàm broă dong kờl làng bol lơh gơs sră nggal tàm điện tử, tàm hơ̆ uă ngan là ală cau dờng sơnam, ờ hoan git mờ măi mok pa. “Añ dong kờl làng bol tơmŭt sră pơ-àr gơnoar atbồ dà lơgar, sră nggal mìng là sră lơh cơng mùl màl sră pơ-àr dê, tơmŭt ală sră pơ-àr gơrềng tus ù tiah. Añ pa bơto sồr, pa dong kờl làng bol tơn”. 

Jăt ồng Nguyễn Xuân Cảnh, Củ tịc Anih duh broă Làng bol sơnah ƀòn Phú Yên pà git, tơnơ̆ dà tih dà cò, khà sră nggal gơguh ni sơna, geh uă cau roh jơh sră sră pơ-àr tờm. Tềng đăp mờ bơta do, sơnah ƀòn neh lơh wơl ală mpồl lơh broă drơng ala mpồl bơtiàn, ai ală kwang bàng tus tơl ƀòn nàng bơto sồr, dong kờl làng bol yal wơl, bơtơl sră nggal. “Cơl dŭ lơh broă sră pơ-àr gơnoar atbồ dà lơgar tŭ lơi kung ai bơh 1 tus 2 nă kwang bàng lơh broă nàng bơto sồr bè adăt boh lam. Geh tŭ kung ai đoàn ơruh pơnu, bưu điện đơs ngan jăt mờ gah broă, di lah kờñ den geh cau lơh broă”.

Ờ mìng sơnah ƀòn Phú Yên, jơh ală sàh tàm tiah đah măt tơngai Lik càr Dăk Lăk ndrờm gơtìp aniai tài dà bam. Tàm hơ̆, pe anih lơh broă drơng ala sră pơ-àr gơnoar atbồ dà lơgar tàm Hoà Xuân, Đông Hoà mờ Tuy An Tây gơtìp gơbam dà jrô, lơh aniai ờ uă phan bơna bal mờ lơh gơrềng ờ niam tus mờ broă lơh. Ală anih lơh broă do neh mhar lơh niam wơl, ai wơl cau lơh broă nàng bañ gơtìp koh gơl broă bơsong sră nggal ai làng bol in.

Ồng Trần Văn Biên, Củ tịc Anih duh broă Làng bol sàh Tuy An Đông pà git: “Tus tŭ do anih lơh broă do neh mŭt lơh broă wơl, gam dong kờl làng bol bơtơl kung bè lơh wơl ờ uă sră pơ-àr gơwèt hìu nhă. Tŭ do khà kwang bàng, kông cứk lơh broă tơl, sền gŏ jơnau kờñ bơh làng bol dê uă den tàng rơ̆p hòi tai mpồl ơruh pơnu, ờ uă mpồl lơh broă dong kờl nàng di tŭ bơsong ai làng bol in”.

Dùl nhai tơnơ̆ dà tih dà cò, ală bơta tam gơl bè sră pơ-àr làng bol tàm tiah dà tih dà cò đah măt tơngai Lik càr Dăk Lăk neh geh bơsong jơh. Broă rơcang tơnguh cau lơh broă bal mờ lơh wơl ală măi mok di tŭ neh dong kờl ală tiah bè Tuy An Đông ha là Phú Yên ờ gơtìp bơta gơlời sră nggal ờ geh bơsong. Ală sră pơ-àr gơnoar atbồ lơgar geh lơh wơl neh di tŭ gơs phan lơh broă adăt boh lam nàng làng bol kơl jăp rài kis broă lơh sa mờ bơsong ală broă gam gơlời tơnơ̆ mờ rềs àr bơh trồ tiah.