Là broă lơh sơnđờm ai Tơngleh mpồl lơh sa kă bro dềt mờ di mơ càr Lâm Đồng in bal mờ tơngume “Tam gơl dơ̆ lĕ bal tơlir mờ sồ”, Anih cribơyai geh bơta tus bal bơh ală cau ătbồ, cau gĭt wă jrô bal mờ rlau 100 mpồl lơh sa kă bro di mơ mờ dềt càr Lâm Đồng dê. Anih cribơyai nàng kờñ dong ală mpồl lơh sa kă bro tơngguh uă gĭt wă, bồ tơngoh kơlôi sơnơng, wă bơta tờm bơta gơrềng đah Tiah ơm kis, Mpồl bơtiàn mờ Ătbồ broă mpồl lơh sa kă bro (ESG) tŭ do là jơnau sồr pal lơh jăt.

Càr Lâm Đồng tŭ do geh rlau 30 rbô mpồl lơh sa kă bro, mìng là mpồl lơh sa kă bro dềt mờ di mơ, bal mờ drà tăc mờ lơgar ndai phan bơna tus ală lơgar câu Á geh tus khà rlau 60%; câu Âu 26%; gam wơl là ală kơnhoàl ù tiah ndai. Ală cau gĭt wă jrô đơs là, kờñ lòt ngài rlau ală mpồl lơh sa kă bro càr Lâm Đồng dê ờ mìng ơm wơl tàm jơnau “geh phan bơna nàng tăc” mờ pal kơlôi tus “geh phan bơna lơh geh ală jơnau sồr bơh drà kă bro dê, geh jơnau tơnggĭt nàng lơh cơng, geh ală anih ătbồ broă nàng sok sền mờ geh pràn jak mblàng lơh loh mờ cau lơh broă bal”.