Mùl màl, bơh nhai 10, Bí thư Chi bộ, Lam bồ thôn, Lam bồ Jơnum làng bol tiah drà mờ Lam bồ Mpồl Lơh broă mặt trận tàm càr Gia Lai geh dờp bơta dong kờl pa, gơ jăt bơta ơnàng ƀòn lơgar dê. Tàm ală thôn, jơnum làng bol tiah drà gal làng bol mờ bàr pe ƀòn lơgar krơi is, khà dong kờl bơh 5 tơlak 850 rbô tus rlau 6 tơlak 550 rbô đong dùl nă dùl nhai; tàm ală ƀòn lơgar gam wơl, bơh 4 tơlak 680 rbô tus mờr 5 tơlak 400 rbô đong. Ală gơnoar broă tus bal lơh broă ndai tàm thôn, jơnum làng bol tiah drà geh dong kờl 1 tơlak 900 rbô đong dùl nă dùl nhai; dilah ăt tai bal gơnoar broă ndai mờ tơrmù geh dùl nă cau den geh dờp tai 50% khà dong kờl bơh gơnoar broă ăt bal tai.

Ồng Vi Văn Vượt, Bí thư Chi bộ mơkung là Lam bồ thôn Thanh Sơn, sàh Chư A Thai pà gĭt, broă tam gơl bơta dong kờl bơh nhai 10 là bơta pơndờm pơnđiang gơ wèt mờ ală cau să tờm tơn dờp lơh kơnòl broă tàm tiah làng bol ơm kis. Să tờm ồng ăt tai bal bàr gơnoar broă den tàng dờp kờp jơh priă dong kờl pơgăp 8 tơlak 500 rbô đong dùl nhai. Bulah bè hơ̆, gơ wèt mờ cau mìng dờp lơh dùl gơnoar broă mờ gam pal drơng gàr ai hìu bơnhă in, priă lơh geh bơh broă lơh tàm thôn kung gam kal ke lơh geh jơnau kờñ rài kis dê. Bơh mùl màl do, ồng Vượt dan càr pal geh tai gùng dà broă rơndăp lơh nàng dong kờl kwang bàng kâp hơđơm iang nùs, lơh sir niam broă:

“Mờ khà dong kờl tŭ do, añ sơning là di tơl đau, añ lơh geh di. Ai ală oh mi ndai ờ ăt tai bal gơnoar broă den kung gam kal ke sơl. Jăt añ, càr pal geh gùng dà broă rơndăp lơh dong kờl măy mŏk mờ geh ală dơ̆ bơsram tàp bè bơsong sră nggal”.

Bal mờ broă dong kờl ai cau pơn jăt tai lơh broă in, Gia Lai lời rlau 50 tơmàn đong dong kờl pơgăp 1 rbô 820 nă cau pal rlô tơnơ̆ rơndăp tăp sèng mơya ờ gơ wèt cau dờp bơta dong kờl jăt Jơnau lơh nền 154 Chính phủ dê. Pah nam lơh broă, cau rlô broă geh dong kờl ndrờm mờ 0,7 dơ̆ khà dong kờl bơh nhai tàm pơn jăt bal lài mờ tŭ rlô. Bàr pe nă cau neh tơl sơnam rê rlô broă halà gam geh dờp bơta dong kờl priă nhai rê rlô broă, roh pràn lơh broă geh dong kờl dùl dơ̆ 10 tơlak đong dùl nă. Mò Phạm Thị Tố Hải, Kwang bàng Mpồl Lơh kơnòl broă sùm Tỉnh ủy, Kwang Lam bồ Sờh Broă dơlam is càr Gia Lai, pà gĭt:

 “Pơndrờm mờ jơh gùt lơgar, Gia Lai kung gam ơm tàm khà tă tơm là khà uă. Kes priă càr dê kung mìng tơl tă tơm geh tàm khà do lơm. Ai tàm khà do den rơ̆p kơ̆ kơl jăp tàm rơndăp kes priă, priă jền tàm tŭ tơngai mờ ai ală nam pơn jăt tai in. Dilah geh bơta tàm ntrờn den càr rơ̆p tam gơl gơ in kơ̆ kơl jăp rlau”.

Broă tam gơl dong kờl mờ dong kờl cau rlô broă geh càr Gia Lai lơh tàm tŭ rơndăp wơl mpồl kwang bàng tàm thôn, jơnum làng bol tiah drà tơnơ̆ rơndăp tăp sèng. Mờ jơnau kờñ gàr gơnoar kwơ ai ală cau pơn jăt tai lơh broă in, mơkung geh tai broă dong kờl ală cau pal rlô broă mơya ờ gơ wèt cau dờp bơta dong kờl bơh Dà lơgar dê.