Tàm sàh Bảo Lâm 2, dà bơh đah tô ală croh dà tus mhar ngan, lơh gơbam bơh 80 phơng tus 1 thơ̆k 2 phơng tàm uă ƀòn ơm kis. Gơnoar atbồ ƀòn lơgar neh hòi jà mpồl ling, kwang àng, ơruh pơnu dong kờl làng bol kờl ñhoa, ntrờn phan bơna mờ ntrờn rơlao 40 hìu tus tàm tiah lơngăp lơngai. Ală hìu pơrjum thôn geh ai ngui nàng lơh anih ơm.

Tàm Dà Làc, mìu sơr jŏ ngai kung lơh gơbam dà tàm ờ uă tơl gùng. Tàm sơnah ƀòn Cam Ly – Dà Làc, dà croh Tô Ngọc Vân lơh lìu tàm gùng, geh tiah gơbam mờr 1 thơ̆k, lơh uă rơndeh ôtô chơ̆t măi. Geh ờ uă tiah ndai tàm sơnah ƀòn Lâm Viên – Dà Làc mờ sơnah ƀòn Xuân Hương – Dà Làc kung gơtìp gơbam dà. Tơnơ̆ mờ mìu rơhờt, dà tàm uă tiah gơhoài soăt mhar, mpồl lơh broă geh gơnoar bal mờ làng bol tơrgùm toah wàs ù bŏ, bơsong hoàc huơr.