Drim ngai 30/12, ồng Nguyễn Thiên Văn, Phó Củ tịc Anih duh broă Làng bol càr Dăk Lăk neh kĭ sră đơng lam sồ 12306 pơyua Sở Broă lơh sa sươn sre mờ Bơtàu tơngguh Ƀòn lơgar, Sở Lơh sa mờ măy mŏk mờ Kă bro phan, Sở Lơh sơnơm, Kwang àng càr mờ Anih duh broă Làng bol ƀòn dờng Buôn Ma Thuột sồr lùp lơh loh làng dơ̆ broă khuah hòn tram dà sơnơm gơtìp kơryan ờ ai ngui tàm càr Dăk Lăk, gơrềng tus jơnau cih bơh VOV dê mờ măt “Khuah hòn tram dà sơnơm gơtìp kơryan ờ ai ngui tàm càr Dăk Lăk: Anih lơh broă geh gơnoar neh ‘tam tuh’ kơnòl”.

Jăt mờ hơ̆, Anih duh broă Làng bol càr Dăk Lăk sồr Sở Broă lơh sa sươn sre mờ Bơtàu tơngguh Ƀòn lơgar đơng lam, pơgồp bal mờ ală anih lơh broă geh gơrềng bè Sở Lơh sa mờ măy mŏk mờ Kă bro phan, Sở Lơh sơnơm, Kwang àng càr, Anih duh broă Làng bol ƀòn dờng Buôn Ma Thuột, mờ ală anih lơh broă geh gơnoar in cih jơnau yal bè broă lơh ătbồ niam sàng goh phan sa gơ wèt mờ 6 anih lơh gơlik khuah hòn ngui dà sơnơm gơtìp kơryan ờ ai ngui (ơm bơdìh sră cih măt geh gơnoar ngui), broă lơh lùp khàu, jòi lùp anih tờm lơh, ai jơh wơl phan bơna mờ cồng nha lơh jăt tus tơngai tŭ do. Anih duh broă Làng bol càr Dăk Lăk sồr ală anih lơh broă geh gơnoar yal loh làng khà sră kĭ dờp anih lơh sa tơl bơta niam sàng goh phan sa nàng lơh gơlik, kă bro khuah hòn tàm ù tiah càr, mơkung dan broă lơh ătbồ ală anih lơh gơlik, kă bro khuah hòn tàm tơngai tus.