Jăt jơnau yal, nam 2025, càr Dăk Lăk geh 4 khà broă lơh sa tờm sơrlèt mờ broă rơndăp lơh geh ai, tàm hơ̆ kờp jơh khà phan tăc mờ lơgar bơdìh gơguh rơlao 26% pơn drờm mờ nam 2024; kờp jơh priă geh 18 rơbô 208 tơmàn đong, gơguh 28,56%; priă geh bal 80,6 tơlăk đong.

Rài kis broă lơh broă sa mpồl bơtiàn geh gàr niam mờ broă lơh gơs 100% broă rơndăp lơh 2 rơbô 800 nơm hìu ơm mpồl bơtiàn mờ tơn jơh hìu sèt, hìu ồm ñhăt dà mìu. Mŭt tàm nam 2026, do là nam sơnrờp ngan ai broă rơndăp lơh bơtàu tơnguh bơh nam 2026 tus 2030, càr Dăk Lăk ai jơnau kờñ lơh geh bơta pràn wèt tus gơguh lơh sa bàr sồ; khà gơmù rơƀah bal gùt càr dê geh bơh 3%, mìng is tiah làng bol jơi bơtiàn ờ gal cau gơmù bơh 4% rơlao hờ đang; lơh mhar broă tam gơl lơh sa jăt broă lơh drơng ala – lơh sa mờ măi mok – bơ̆t bơtàu. Jơnau đơs pơn dŭt pơrjum, ồng Tạ Anh Tuấn, Củ tịc Anih duh broă Làng bol càr Dăk Lăk đơs nền, jơh ală mpồl lơh broă gơnoar atbồ pal tam gơl bồ tơngoh pa, lơh broă pràn mờ dờp kơnòl tus dŭt ndơl broă lơh neh geh ai, mờ lơh mhar broă bơcri priă dà lơgar dê, pơgồp bal mờ kơnòl broă mùl màl tus tơl cau tờm bơcri priă, tơl tiah mờ lơh ngan bơsong ală rơndăp broă lơh lơyài jăt mờ tơngai neh geh ai.