Tàm pơrjum, ala măt uă mpồl lơh broă tàm Anih jơnau đơs neh geh jơnau đơs nàng lơh loh rơlao tai bè ală cồng nha neh lơh geh, mờ ai tơngŏ loh làng ală broă gam ờ pràn mờ ai geh ală gùng dà broă lơh nàng bơsong, gàr niam tàm nam 2026 lơh gơs niam kơnòl broă geh jào.

Dờp, jờng rơ ală broă lơh ngan bơh ală mpồl lơh broă dê, Ƀí thư Đảng ủy, Kwang atbồ dờng Anih jơnau đơs Việt Nam ồng Đỗ Tiến Sỹ đơs nền: Tơngai tus, ală mpồl lơh broă pơn jăt tai tơnguh nùs nhơm tam klăc bal, ring bal, pơn jăt tai tam gơl pa tơngu me, uă broă mblàng yal, ai tơngŏ gơnoar anih lơh broă sră ƀăo tờm lơh broă bal mờ dà lơgar dê. Kwang atbồ dờng Anih jơnau đơs Việt Nam đơs nền: nam 2026 lơh jăt uă kơnòl tờm bè: Pơrjum dờng Đảng gùt lơgar dơ̆ XIV, lơh jăt Jơnau lơh nền tàm Pơrjum dờng dơ̆ XIV, dơ̆ tĕ khà Quốk hội mờ Mpồl duh broă Làng bol ală kấp, bal mờ ală broă lơh kăc màng geh lơh uă, tơl ală bơta bơh kấp ủy, gơnoar atbồ tus mờ Jơnau lơh nền tàm pơrjum Mpồl duh broă Làng bol ală kấp dê.