Tàm pơrjum, Anih duh broă mặt trận dà lơgar Việt Nam càr Dăk Lăk neh yal jơnau tơnggit bơh ală cau tơlik mat tĕ khà dê. Jat hơ̆, mpồl tĕ khà sồ 4 geh 5 nă cau tơlik mat tĕ khà cau ala mat Quôk hội; mpồl tĕ khà sồ 22 geh 5 nă cau tơlik mat tĕ khà cau ala mat Mpồl duh broă Làng bol càr. 

Ală cau tơlik mat tĕ khà neh yal tơngume lơh broă, tơrgùm tàm jơnau kờñ chồl tơnguh bơtàu tơnguh lơh sa – mpồl bơtiàn, tơnguh niam rài kis làng bol, ngan là tiah làng bol jơi bơtiàn dồ êt nă cau; lơh pràn tam gơl wơl sră pơ àr gơnoar atbồ, tam gơl sồ mờ tơnguh bơta jat sền broă lơh jat gùng dà broă lơh, adat boh lam.

Đơs tềng đap cau tĕ khà, ồng Lương Nguyễn Minh Triết, Kwang geh jơng Đảng dà lơgar, Ƀí thư Tỉñ ủy càr Dăk Lăk đơs nền, dilah geh cau tĕ khà pin dờn pồ lơh cau ala mat Quôk hội khoă XVI rơp lơh ngan lam lơh wil tơl kơnòl bơh cau ala mat dê, tơnguh tai tìp mat tơm boh bơr mờ cau tĕ khà bal mờ làng bol, di tŭ yal ală jơnau đơs, jơnau dan, bơta kơp kờñ dipal tus ală anih lơh broă geh gơnoar.