Cau mblàng mờ sền: Lơ Mu K’Yến/Cau cih: Hoàng Qui (VOV Tây Nguyên)
Tàm Ƀlàng rơndeh par Phù Cát, mpồl Kwang àng rơndăp bàr mpồl sền gàr kràñ ngan, bơh kơnhoàl ù tiah đah bơdìh tus dơlam hìu ga. Broă lơh sền swì lơngăp lơngai mờ lài mờ dơ̆ par geh lơh kràñ cê ngan, mơya kung gam ai tơl bơta ƀươn, sơrbăc mhar ai năc lòt gùng in. Cih dờp ngan ngồn pà gŏ, uă năc lòt nhơl đơs niam bơta bơta lơh broă mờng chài, niam lơngăp lơngai mờ đềt mềr bơh mpồl lơh broă geh gơnoar dê. Bi Hoàng Thị Thùy, năc lòt nhơl tus bơh Hà Nội yal:
“Tus ƀlàng rơndeh par Phù Cát den oh gŏ broă lơngăp lơngai rơndăp tăp sèng tàm do gơ là niam lơngăp lơngai in, lơh sră nggal ală broă mhar ngan. Dilah geh tŭ wơl wơl mờ săc rwah anih lòt nhơl den oh rơ̆p rwah wơl tus wơl Quy Nhơn dùl dơ̆ tai”.
Jăt Cơldŭ Ătbồ lik mŭt mờ lơgar ndai, Kwang àng càr Gia Lai, mìng tàm pơgăp nggùl nhai do, mpồl lơh broă geh gơnoar neh gàr niam lơngăp lơngai ai mờr 300 dơ̆ par in, drơng mờr 50 rbô nă năc lòt gùng. Mờ pah ngai kung lơh jăt sòl pơnđàng gĭt nđờ jơ̆t tấn phan kă bro mờ phan cèng kĭ pơyua lòt gan bàr ƀlàng rơndeh par Pleiku mờ Phù Cát.
Thượng tá ồng Ngô Lam Sơn, Phó Lam bồ Cơldŭ Ătbồ lik mŭt mờ lơgar ndai, Kwang àng càr Gia Lai pà gĭt, mpồl geh sồr lơh jăt kràñ ală jơnau sồr, mơkung lơh ngan ai tơl bơta ƀươn ngan rlau jơh ai năc lòt gùng in, pơgồp bơnah gơhòi gơ jà gal ngan năc lòt nhơl tus mờ ƀòn lơgar tàm Nam Lòt nhơl Dà lơgar.
“Đơng lam mpồl lơh broă neh pơrjum mờ yal tus kwang bàng lơh jăt broă lơh tàm bơdìh ƀlàng rơndeh par in; tơrgùm lơh niam broă lơh mblàng yal, tơm bơh bơr mờ năc lòt gùng mờ ai tơl bơta niam ngan rlau jơh nàng khi in tus ndo mờ sùm gŏ gơlơh niam ngan tàm nùs nhơm. Mơkung pơgồp bal mờ ACV Phù Cát lam lơh ală pano, broă lơh…nàng lơh bè lơi tus geh rềp ngan rlau jơh mờ năc lòt gùng in gam geh măt tàm ƀlàng rơndeh par nàng khi sền gŏ, khi lơh jăt”.
Nam Lòt nhơl Dà lơgar 2026, càr Gia Lai geh jơnau kờñ wă pơgăp 15 tơlak nă năc tàm dơlam mờ bơdìh lơgar. Bal mờ broă gàr niam lơngăp lơngai, niam lơngăp lơngai tàm ală ƀlàng rơndeh par, Gia Lai kung sồr ală gah rơndeh par tơngguh dơ̆ par ală dơ̆ par tus Pleiku mờ Phù Cát, drơng ală broă lơh dờng tàm nam.
Viết bình luận