Bơh do, Ƀộ Bơt bơtàu tơngkah broă kơlôi sơnơng rơndap broă lơh pal lơh jat wil tơl ală jơnau cih bơh adat boh lam dê bè gơnăp gơnoar mờ khà priă bơcri dà lơgar dê ai. Tàm sră nggal bè kơlôi sơnơng bơcri priă gùng rơndeh lòt mhar Pleiku - Buôn Ma Thuột – Gia Nghĩa jat broă lơh lơh bal đah dà lơgar mờ nă să is, pơyua Đức Long Gia Lai, Ƀộ Bơt bơtàu yal: rơndap broă lơh do geh broă lam lơh dờng, lòt gan uă tiah mờ geh ngui kes priă dà lơgar. Bè hơ̆ den tàng Ƀộ Bơt bơtàu đơs là, broă kơlôi sơnơng bơcri priă kờñ pal geh lơh di broă rơndap tap sèng, sră nggal jat Adat bơcri priă jat broă lơh lơh bal đah dà lơgar mờ nă să is, Adat bơcri priă dà lơgar mờ ală sră nggal pơlam lơh jat. Ƀộ Bơt bơtàu sồr Tập đoàn Đức Long Gia Lai lơh broă mờ Anih duh broă Làng bol ală càr Dăk Lăk, Lâm Đồng, Gia Lai nàng lam lơh di broă rơndap tap sèng. Ƀộ Bơt bơtàu rơp pơlam sră nggal pơn jat tai tơnơ̆ tŭ dờp geh jơnau sồr ngan ngồn mờ bơta ring bal bơh ală tiah geh gơ rềng.