Tàm dơ̆ lơh broă, Ƀộ trưởng Ƀộ Bơt bơtàu ồng Trần Hồng Minh ring bal mờ càr bè tam gơl bơcri priă lơh rơndap broă lơh gùng rơndeh lòt mhar Nha Trang – Liang Khàng tus tơngai dơ̆ 2 bơh nam 2026 tus nam 2030; jàu lơh tờm rơndap broă lơh ai càr Khánh Hòa in. Gơwèt mờ Rơndap broă lơh gùng rơndeh lòt mhar tiah đah tô – tiah đah jum hờ tiah đah mat tơngai mut, gơl Pleiku – Buôn Ma Thuột – Gia Nghĩa, jàu càr Dăk Lăk in là càr tờm atbồ. Gơ wèt mờ broă bơcri priă lơh niam gùng dà lơgar 27, tơmut tàm broă lơh bơcri priă dà lơgar càr dê mờ dan kes priă dong kờl bơh dà lơgar dê.

Nàng sơlơ tơnguh tai bơta tàm tơrbŏ bal lơh gơlik bơta tam gơl pràn bơtàu tơnguh lơh sa – mpồl bơtiàn bơh càr Lâm Đồng dê, Ƀộ trưởng Ƀộ Bơt bơtàu ồng Trần Hồng Minh sồr tơnguh mhar tơngai lam lơh ală rơndap broă lơh gùng rơndeh lòt mhar kuơmàng bè: Bảo Lộc – Liang Khàng; Tân Phú (càr Đồng Nai) – Bảo Lộc (càr Lâm Đồng); gùng rơndeh lòt mhar tiah đah tô – tiah đah jum hờ tiah đah mat tơngai mut gơl Gia Nghĩa – Chơn Thành; sền gròi bơcri priă lơh niam 3 anih ơhò dà lềng ơm gam geh tŭ do bơh càr dê. Bè gùng rơndeh par, gơ wèt mờ rơndap broă lơh lơh niam, pờ ơnàng gùng par ƀlàng rơndeh par Liang Khàng geh kờp jơh priă bơcri lơh rlau 1 rbô tơmàn đong lam lơh bơh nhai 3 tus nhai 9 tus do mờ ƀlàng rơndeh par Phan Thiết.