Tàm pơrjum, cau tĕ khà pin dờn mờ ring bal uă yal tơngĭt ồng Lê Hoài Trung tơlik mat tĕ khà Cau ala mat Quôk hội khoă 16 mờ kơ̆p kơnờm dilah geh pồ lơh Cau ala mat Quôk hội, ồng rơ̆p pơn jat tai lơh jat niam bồ tơngoh jak, mờng chài rơ̆ ru, nùs nhơm geh kơnòl, tus bal jơh nùs, geh cồng nha tàm ală broă lơh bơh Quôk hội, broă lơh bơt bơtàu mờ sền gàr Dà lơgar, dipal là cau ala mat geh nùs nhơm bồ tơngoh, bơta kơ̆p kờñ bơh cau cau tĕ khà mờ làng bol dê.

Đơs tàm pơrjum, Ƀộ trưởng ồng Lê Hoài Trung đơs nền, dilah geh pồ lơh Cau ala mat Quôk hội rơ̆p pơn jat tai lơh jat niam nùs nhơm geh kơnòl uă ngan rlau jơh, lơh jat niam gơnoar bơh cau ala mat làng bol dê pồ; sền dờng màng dơ̆ tìp mat; iăt kơno ală jơnau đơs, nùs nhơm, bơta kơ̆p kờñ bơh cau tĕ khà dê nàng đơs wơl mờ ală anih lơh broă geh gơnăp gơnoar bè ală jơnau kờñ mờ cau tĕ khà dê kơ̆p gơn. 100% cau tĕ khà tàm Pơrjum neh pờ tê ring bal yal tơngĭt ồng Lê Hoài Trung tus bal tơlik mat tĕ khà Cau ala mat Quôk hội khŏa 16.