Mờ Tây Nguyên – Đah jum Tàm gùl lơgar, bơh tàm dùl bă tiah gam uă kal ke, tŭ do neh ai tơngŏ gơnoar kwơ màng bè lơh sa, sền gàr dà lơgar – lơngăp lơngai, ai geh tơngu me nàng tơmŭt tàm nùs nhơm kơlôi sơnơng bơtàu tơnguh jŏ jòng bơh “rài brồ să” dê. Ồng Hoàng Công Khiêm, Phó Ƀí thư Duh broă sùm Đảng ủy sơnah ƀòn Xuân Trường – Dà Làc, càr Lâm Đồng pà git: “Kwang bàng, đảng viên mờ Làng bol pin dờn là, mờ bơta pràn tam klăc bal, tơl nă làng bol lơh geh nùs nhơm kơ̆p gơn, bồ tơngoh kơlôi sơnơng pràn is, să jan pràn is den dà lơgar rơ̆p bơtàu tơnguh, Làng bol hờm ram, gơboh gơbài”.

Bơta ai tơngŏ kwơ màng bơh Sră nggal Pơrjum dờng XIV Đảng dê là lơh geh broă gơguh lơh sa pa, ai bơta chài – măi mok, tam gơl pa bơceh lơh mờ tam gơl sồ lơh bơta pràn tờm. Mờ Tây Nguyên, broă lơh do pờ geh dơ̆ niam nàng lơh geh tai broă lơh sa suơn sre jăt gùng dà broă lơh măi mok pa, lơh sa tơlir, gơlòt bal, tơnguh bơta kwơ geh lơh. Mờ Đah jum Tàm gùl lơgar, tàm hơ̆ uă ngan là ală tiah jăt gah dà lềng, do là tơngu me tờm nàng bơtàu tơnguh lơh sa dà lềng tơlir, lòt nhơl geh bơta niam uă, năng lượng lơh geh wơl mờ logistics pa. Sră nggal Pơrjum dờng XIV Đảng dê tài bè hơ̆ den tàng ờ mìng ai geh ală gùng dà broă lơh bal bal, mờ gam pờ geh gùng dà bơtàu tơnguh gơdờp mờ bơta krơi is bơh tơl tiah dê. Đảng viên Mai Văn Tuấn, tàm sơnah ƀòn Phù Đổng, càr Gia Lai pà git: “Sră nggal Pơrjum dờng XIV Đảng dê gĭt nền jak chài măi mok, tam gơl sồ là gơn kơnờm bơtàu tơnguh, gơwèt mờ bol añ tàm ƀòn lơgar den wă ƀuơn ngan, lơh bè lơi nàng phan geh lơh bơh broă lơh sa suơn sre tăc geh priă mờ ờ hoan gơtìp rềs àr. Tam gơl sồ ờ di là jơnau lơi kal ke ir, geh jơnau yal tơngit tiah tam, geh jơnau cih điện tử, geh màh jòi tiah tam den phan geh lơh hơ̆ sồng mŭt gơtùi tàm drà kă bro dờng”.

Dùl bơta tơngŏ pơnrơ ngan ndai tàm Sră nggal Pơrjum dờng XIV Đảng dê là đơs nền tus mờ jơnau kờñ lơh broă loh làng: jơnau đơs gơlòt bal mờ lơh broă; jơnau kờñ, kơnòl broă, gùng dà broă lơh mùl màl; pơgồp kơnòl broă mờ cồng nha; ai bơta di nùs bơh làng bol dê lơh bơta was geh cồng nha broă lơh jăt. Jơnau yal do geh kwơ màng ngan gơwèt mờ Tây Nguyên – Đah jum Tàm gùl lơgar dê, tài do là tiah gam kong gơtìp mờ uă bơta lòng bè tam gơl nhơm trồ tiah, rềs àr bơh trồ tiah, ờ pơgồp bal phan bơna, rài kis broă lơh broă sa kơl jăp ai làng bol tàm tiah ngài, tiah làng bol jơi bơtiàn ờ gal cau in. Đảng viên Nay Lợi, kòn cau Jrai, tàm sàh Ia Hiao, càr Gai Lai tơlik nùs nhơm đơs bè do: “Añ di nùs ngan là kwang bàng pal đơs lòt bal mờ broă lơh, đơs ờ uă lơh broă uă, mờ lơh den ai bơta kwơ mùl màl bơh Làng bol dê rơlao jơh”.

Jơh gùt ală Sră nggal Pơrjum dờng XIV Đảng dê là ai tơngŏ gơnoar tờm bơh Làng bol tàm ală gah broă kwơ màng bơtàu tơnguh. Mờ Tây Nguyên – Đah jum tàm gùl lơgar, do là tiah geh bơta gal bè jơi bơtiàn, jăt yàng mờ bơta ơm kis, nùs nhơm do sơlơ geh kwơ màng ngan tàm broă tơnguh nùs nhơm tam klăc bal gùt jơi bơtiàn, gàr kơl jăp cíñ trị mpồl bơtiàn.

Ồng Điểu Xem, kòn cau Mnông, tàm sàh Kiến Đức, càr Lâm Đồng pà git: “Tŭ Đảng ai Làng bol là tờm ngan, làng bol pin dờn ngan. Broă lơh rềp mờ rài kis, kwang bàng iăt làng bol đơs den bŭ lah kal ke kàr lơi, làng bol tŭ lơi kung dùl nùs bal. Tam klăc den di gơlan ƀòn lơgar lơngăp lơngai, dà lơgar bơtàu tơnguh”.

Bơh Sră nggal Pơrjum dờng XIV Đảng dê gơtùi gŏ, “Rài brồ să” ờ mìng sơn đờm bơh ală gùng dà broă lơh kwơ màng, mờ bơh broă tam gơl mùl màl bơh jơh gùt mpồl lơh broă cíñ trị bal mờ broă lơh bal bơh làng bol dê. Tŭ bồ tơngoh bơtàu tơnguh, hơ̆ sồng gơtùi lơh jơh mờ broă lơh mùl màl, Tây Nguyên – Đah jum Tàm gùl lơgar geh tơngu me nàng pràn guh, pơgồp bal tàm broă ngai sơlơ pràn kơl dang tàm broă bơtàu tơnguh bal bơh dà lơgar dê.